د جوزجان ولایت د درزاب ځایناستي ولسوال باز محمد داور سلام وطندار ته وویل، چې «د ازبیکستان اسلامي تحریک» مشر ملک طاهراوف او د ازبیکستان اسلامي حرکت غړی جمعه اکه اوس پهدې ولسوالۍ کې ماشومانو ته د ځانمرګيو بریدونو روزنه ورکوي.
د ده په خبره، د طاهر یولداش زوی د دې ډلې مشر ښوونکی او روزونکی دی، چې پهدې ولایت کې کوچنیو ماشومانو نه د ځانمرګیو بریدګرو په توګه کار اخلي.
د درزاب ځایناستی ولسوال زیاتوي، چې اوسمهال داعش ډلې په «سر درې» او «مغل القاني» سیمو کې د ازبیکستان اسلامي تحریک ډلې ته د فعالیت زمینه برابره کړې، چې د ماشومانو په روزنې سره ځانمرګې بریدونه وکړي.
شاوخوا ۸ میاشتې مخکې هم یوې امنیتي سرچینې شرط سلام وطندار ته ویلي وو، چې د ازبیکستان اسلامي تحریک پخواني رهبر طاهر یولداش زوی د سرپل ولایت صیاد ولسوالۍ ته د داعشي وسلهوالو منظمولو لهپاره راغلی دی.
د درزاب ولسوالۍ ځایناستي امنیه قوماندان عبدالله نوري هم مني، چې د طاهر یولداش زوی او پاکستانیان یوځای پهدې سیمه کې ماشومانو ته د ځانمرګیو بریدونو روزنه ورکوي.
د ده پر وینا دوی ۱۲ یا ۱۳ کلن هلکان د پيسو په مقابل کې ترهګریز فعالیتونه راضي کوي، که راضي شي؛ ښه ګنې په زوره یې له ځانه سره وړي په پټو ځایونو کې روزنه ورکوي.
د جوزجان قوشتپې ولسوالۍ یو شمیر اوسېدونکي هم پهدې سیمو کې د طاهر یولداش زوی او ماشومانو ته د ځانمرګیو بریدونو د روزنې په اړه د اندېښنې په ښودلو سره وايي، که حکومت پهدې ولسوالیو کې پوځي عملیات پیل نهکړي؛ د ازبیکستان اسلامي تحریک فعالیتونه به نور هم پراخه شي.
