د کار، ټولنیزو شهدا او معلولینو چارو وزیرې نسرین اوریاخېلې نن یک شنبه (جنوري۱۷مه) د یوې خبري ناستې پر مهال وویل، چې د کار او ټولنیزو چارو وزارت دوه داسې شرکتونه نيولي، چې غوښتل يې د افغان ځوانانو د بیکارۍ له ستونزو ناوړه ګټه واخلي.
د هغې په وينا، دغه شرکتونه بهرنيو هيوادونو ته تلونکو ځوانانو سره ژمنې کړې وې، چې دوی به هلته ځوانانو ته د کار زمینه برابره کړي.
نسرین زیاته کړه، چې د "ابن الهدا" او "حسېن خېل" په نومونو دغه دوه شرکتونه له هر ځوان څخه د ۵۰۰ او ۱۰۰۰ ډالرو اخیستو په بدل کې وعدې کولې.
د کار او ټولنیزو چارو د وزیره زیاتوي، چې اوسمهال د دغو شرکتونو مسوولان لويې څارنوالۍ ته معرفي شوي دي.
اوریاخیل تور پورې کوي، چې دغه شرکتونه د ځوانانو له اوزګارتیا څخه په ګټې اخیستو د ننګرهار، هرات، بغلان، بدخشان، غزني او یو شمېرو نورو ولایتونو له لسګونو ځوانانو پېسې اخیستي.
د نوموړې پر خبره د کار او ټولنیزو چارو وزارت یواځې له ۵۱ شرکتونو سره تړونونه لري او دغو شرکتونو د ۵۱ شرکتونو له نوم نه په ناوړې ګټنې له ځوانانو پیسې اخیستي، چې ځوانان به په اوو بېلابېلو اروپایي هیوادونو کې په دندو وګوماري.
له بل لوري د کار او ټولنیزو چارو وزیرې دا هم وویل، چې دغه وزارت به په نږدې راتلونکې کې ۲۵زره ځوانان سعودي عربستان ته د کار له پاره ولیږي.
د کار او ټولنیزو چارو وزارت چارواکي وایي، چې افغانستان اوسمهال ۷ میلیونه کاري ځواک لري، چې ۲۴ سلنه یې مطلق بیکاره او شاوخوا ۱۵ سلنه يې بیا زیات بوخت دي.
و مو غوښته، چې د ابن الهد او حسین خیل خصوصي شرکتونو سره اړیکه ونیسو، خو له زیاتو هڅو سره سره بريالي نه شو.
