وروسته له هغه، چې د رحیم داد په نوم حکومت ته د وسله والو طالبانو تسلیم شوی پخوانی سیمه ییز قوماندان یو ځل بیا له طالبانو سره یوځای شو، نو د فاریاب ولایت په خواجه سبز پوش ولسوالۍ کې جنګ زور اخیستی.
د خواجه سبز پوش ولسوال عبدالله معصومي سلام وطندار ته وویل، چې همدا اوس له دغه قوماندان سره د خواجه سبز پوش ولسوالۍ امنیه قوماندان سمونمل هاشم باتور په جګړه بوخت او په خپل لاس ټپي شوی هم دی.
معصومي وايي، چې د افغان ځواکونو له خوا د هاوان ویشتو له امله طالبانو سره د بېرته یوځای شوي قوماندان رحیم داد ورور عبدالرووف سره د ۴ طالبانو وژل شوی دی.
همدارنګه د خواجه سبز پوش ولسوال وویل، چې طالبانو د نظر میده په نوم یو تن، چې د پاڅون کوونکو همکار و په ډزو وژلی دی.
له بل لوري داسې راپورونه هم شته، چې په یاده ولسوالۍ کې د افغان ځواکونو د هاوان له امله ۵ ملکي وګړي ټپيان شوي هم دي.
له بل لوري د فاریاب د عامې روغتیا رییس ډاکټر معروف ثمر وايي، چې دوی ته ۲نارینه، ۲ ماشومان او یوه ښځه په ټپي حالت ور رسيدلې او اوسمهال د افغان ترک په بېړني سرویس کې بستر دي.
له بل لوري امنیتي مسوولین وايي، چې د خنجر ۱۵ په نوم يې ګډ پوځي عملیات پېل کړي دي او همدا اوس د فاریاب ولایت په شورقل للمي او شورقل ابي سیمو کې يې عملیات روان دي.
اوسمهال افغان امنیتي چارواکي هم تاییدوي، چې د فاریاب ولایت خواجه قشري او شورقل ابي سیمې د طالبانو تر ولکې لاندې دي.
وروسته له هغه، چې د ولسمشر لومړي مرستیال جنرال عبدالرشید دوستم په مشرۍ د طالبانو پر ضد په شیرن تګاب، خواجه سبز پوش او دولت اباد ولسوالیو کې پوځي عملیات پېل شول، نو د طالبانو سیمه ییز قوماندان رحیم داد له افغان دولت سره یوځای شو.
د فاریاب ولایت د امنيې قوماندانۍ ویاند عبدالکریم یورش سلام وطندار ته وویل، چې تر اوسه د وسله والو طالبانو د مرګ ژوبلې په اړه کره شمېره په واک کې نه لري، خو وايې چې افغان ځواکونو په لسګونه وسله وال طالبان وژلي دي.
د فاریاب سیمه ییزو مسوولینو پر وینا، رحیم داد د طالبانو یو سیمه ییز قوماندان و، چې د دغه ولایت په خواجه سبز پوش ولسوالۍ کې د روان کال په تېر وري میاشت کې له ۶۵ وسله والو سره له دولت سره یوځای شو، خو دغه قوماندان تېره ورځ بیا د وسله والو طالبانو لیکو ته ورغلی.
یاده دې وي، چې تر اوسه د دغه قوماندان د مخالفت دلیل نه دی معلوم شوی.
