.jpg)
د هرات روغتيايي مسوولان وايي چې د یوې اوونۍ په اوږدو کې د ګرمۍ له امله ۵۰۰ ماشومان د (نسناستې او زړهبدوالي) په ناروغۍ اخته شوي چې له دې جملې یې ۲ تنو خپل ژوند هم بایللی دی.
د هرات حوزوي روغتون ویاند محمدرفیق شېرزي سلاموطندار ته وویل چې له دې شمېر ماشومانو نه د ۱۱۰ هغو روغتیايي وضعیت ښه نهدی.
ښاغلی شېرزی له کورنیو غواړي چې له موسمي ناروغیو نه د ماشومانو د خلاصون په پار نظافت مراعت کړي او د لېریو سفرونو مخنیوی وکړي.
.jpg)
د هرات د ماشومانو روغتون مسوول میرویس عابدي د هوا تودوالی او د برېښنا قطعکېدل د موسمي ناروغیو په ځانګړي ډول د ماشومانو د نسناستې او زړهبدوالي ناروغۍ دلایل بولي او له کورنیو غواړي چې د کورونو د حرارت درجه د ۲۴ نه تر ۲۶ سانتيګراد پورې وساتي.
د هرات د ماشومانو روغتون د مسوول په خبره، پهدې ولایت کې د موسمي ناروغیو د زیاتوالي ترڅنګ د خوارځواکو ماشومانو سلنه هم ډېره شوېده.
