د عامې روغتیا وزارت وايي، په تېره یوه شپه او ورځ کې ۱۵۴ نور کسان پر کورونا ویروس اخته شوي دي.
د دغه وزارت په وینا، د تازه پېښو په ثبت سره پر دې ناروغۍ د اخته کسانو شمېر ۳۴ زره ۶۰۵ ته ورسېده.
د عامې روغتیا وزارت لهخوا د تازه اعلان شویو شمېرو له مخې، په تېرو ۲۴ ساعتونو کې ۲۸ کسان د کورونا ویروس له امله مړه شوي چې په دې سره د ټولو مړو شویو شمېر ۱۰۳۸ ته ورسېده.
هرات کې د تېرو ۲۴ ساعتونو پر مهال له کورونا ویروس نه د روغو شویو کسانو تر ټولو لوړه شمېره ثبت کړې ده.
د دغه ولایت د عامې روغتیا ریاست ویاند محمدرفیق شېرزوی وايي، په هرات کې د تېرې یوې شپې او ورځې پر مهال ۳۵۰ کسان له کورونا ویروس نه ښه شوي چې ورسره په دغه ولایت کې د ټولو رغېدلو شمېر ۲ زره ۲۸۴ کسانو ته ورسېده.
د هرات د عامې روغتیا ریاست د شمېرو له مخې، په تېره یوه شپه او ورځ کې ۱۸ کسان پر کورونا ویروس اخته شوي او ورسره په هرات کې پر کورونا ویروس د اخته کسانو شمېر ۵ زره ۲۰۸ ته ورسېده.
