د کډوالو او راستنېدونکو چارو وزارت له خوا نن (شنبه) ورځ په کابل کې د دغه وزارت او په ولایتونو کې د دغه وزارت د ریاستونو ترمنځ د نظرونو تبادلې درې ورځنی ورکشاپ جوړ شو، چې موخه يي د چارواکو په وینا د راستنېدونکو او بې ځایه شویو کډوالو په برخه کې د انساني ناورین مخنیوی دی.
د کډوالو او راستنېدونکو چارو وزیر سید حسین عالمي بلخي وویل، په هېواد کې د جګړې د زیاتېدو سره جوخت په کور دننه د بې ځایه شویو کډوالو شمېر هم زیات شوی دی.
د بلخي پر وینا، په کور دننه د بې ځایه شویو کورنیو د شمېر زیاتوالي له یوې خوا او له بهرنیو هېوادونو د کډوالو راستنېدو له بل لوري د دغه وزارت خزانه خالي کړي دي.
سید حسین عالمي بلخي وايي، چې له دې ټولو سره سره د مالیې وزارت د پیسو په برخه کې خپله ژمنه کړې ده.
د کډوالو وزارت د چارواکو پروینا، د روان ۲۰۱۶ میلادي کال له پیله تراوسه ۴۰۰ زره کسان له پاکستانه هېواد ته راستانه شوي او ښايي دغه شمېر د روان کال ترپایه ۷۰۰ زره کسانو ته ورسیږي.
په همدې حال کې په افغانستان کې د کډوالو او راستنېدونکو په چارو کې د ملګرو ملتونو د سترې کمېشنرۍ ویاند نادر فرهاد وايي، اوسمهال په افغانستان کې ۱.۲ میلیونه بې ځایه شوي کسان موجودي، چې دغه شمېر کسانو ته د افغان دولت رسېدنه خورا ستونزمن کار دی.
د کډوالو او راستنېدونکو چارو وزارت چارواکي وايي، په پاکستان کې د کډوالو وضعیت ښه کېدول او د راستنېدونکو کډوالو ستونزو ته د رسېدنې په موخه تمه کېږي، چې په روانې میاشت کې د افغانستان پاکستان او یو "ان، اچ، سي، ار" ترمنځ درې اړخیزه غونډه جوړه شي.
