د دې ولایت سیمه ییزو چارواکو نن غرمه ۱۲ بجې ویلي، چې د طالبانو له خوا پر پولیسو باندې د حملې پر مهال ۳ طالب قومندانان وژل شي او ۳ پولیس ټپیان شوي دي.
د بامیانو والي ویاند عبدالرحمان احمدي سلام وطندار ته وویل، چې نن سهار یو شمېر وسله والو طالبانو د دغه ولایت د کهمر ولسوالۍ په اشپېشته سیمه کې پر امنیتي پوستو برید کړی دی.
د احمدي په خبره په دغه نښته کې د طالبانو ۳ مهم قومندانان وژل شوي او د افغان امنیتي ځواکونه پر وخت سیمي ته رسېدلي دي او په وینا یې، نښته لا هم دوام لري.
په ورته وخت کې طالبانو د یوې اعلاميې په خپرولو سره ویلي، چې د ۲ پوستو د نیولو ترڅنګ یې ۸ پولیس وژلي او ۵ یې له ځانه سره وړي دي.
خو د بامیانو والي ویاند احمدي د طالبانو دغه ادعا دروغ ګڼي او وايي، چې په نښته کې یې د طالبانو ۳ مشهور قومندانان وژل دي.
د طالبانو دغه برید پر داسې مهال کېږي، چې د بامیانو ولایت سیمه ييز چارواکي دغه ولایت ته د سارک غړیو هېوادونو د راتګ لپاره چمتوالی نیسي.
د یادولو ده، چې له دې وړاندې هم د بغلان ولایت له خواوو نه د بامیان ولایت د همدې ولسوالۍ پر یو شمېر پوستو وسله والو طالبانو حمله کړې وه.
