.jpg)
د لویې څارنوالي مسوولانو نن په کابل کې د یوې خبري غونډې پر مهال په وروستیو شپږو میاشتو کې د ښځو پر وړاندې د تاوتریخوالي په اړه خپل تازه راپور خپور کړ.
د ښځو د تاوتریخوالي مخنیوي په چارو کې د لویې څارنوالي مرستیاله سینا شنا منصور وايي، په هېواد کې د کورنټین په درېوو میاشتو کې له دې ادارې سره د ښځو د وهلوټکولو ۲۴۹ قضیې ثبت او څېړل شوې دي.
د منصور په وینا، د مالي کال په لومړیو شپږو میاشتو کې د ټول هېواد په کچه د ښځو پر وړاندې د تاوتریخوالي د یو زر او ۱۱۷۳ پېښو له ډلې نه ۵۴۸ یې د وهلوټکولو، ۱۴۱ قضیې د ځورولو او ۱۲۱ پېښې یې هم د جنسي تېري دي چې په لویې څارنوالي کې ثبت شوې دي.
د ښځو د تاوتریخوالي مخنیوي په چارو کې د لویې څارنوالي مرستیاله زیاتوي، ۳۳۹ د تاوتریخوالي پېښې چې د تاوتریخوالي تر ټولو ډېرې پېښې جوړوي، په کابل کې ثبت شوې دي.
په همدې حال کې د لویې څارنوالي ویاند جمشېد رسولي وايي، په تېر یوه کال کې د دې ادارې له لوري د اداري فساد، جنايي جرمونو، انسان تښتونې او نورو قضیو ۴۱ زره موارده څېړل شوي دي.
لویې څارنوالي د ماشومانو د تخلفاتو پېښو د ثبت او څېړلو خبر هم ورکوي. د لویې څارنوالي د تازه راپور پر بنسټ، د ماشومانو د تخلفاتو ۸۳۲ قضیې یې هم څېړلې دي.
