د کورنيو چارو وزیر نورالحق علومي افغان امنيتي ځواکونو ته امر وکړ، چې له دې وروسته په وسله والو مخالفينو او ترهګرو باندې د جنګ په مېدان کې هيڅ رحم ونه کړي.
علومي د چهارشنبې په ورځ (۲۰۱۵ زېږدیز/ مې۶) د ځانګړو ځواکونو د فراغت په مراسمو کې سپارښتنه وکړه، چې امنیتي ځواکونه دې د وسله والو مخالفینو پر وړاندې له نرم چلند ځېنې لاس په سر شي.
نوموړي د افغان امنيتي ځواکونو د پیاوړتيا ستاينه وکړه او زياته يې کړه، چې د تېرو کلونو په پرتله افغان ځواکونه د ترهګرو سره په جګړه او د مخدره توکو په مخنيوي کې پياوړي شوي.
علومي دا هم وویل، افغان ځواکونه اوس دا توان لري، چې د ترهګرو پلان مخکې له بريده شنډ کړي.
د کورنيو چارو وزیر زياته کړه، د دولت مخالف وسله وال په پلان کې لري، چې سږکال د هېواد ځينې سيمو څخه د ځانونو له پاره سنګر جوړکړي.
همدارنګه نورالحق علومي د عامو وګړو څخه غوښتنه وکړه، چې د افغان امنيتي ځواکونو ملاتړ وکړي.
باید وویل، شي د تېرو ۱۳ کلونو راهیسې د افغان حکومت له لوري د مخالفو وسله والو د وژلو له پاره دا لومړی دستور دی دی، چې د امنيتي لوړ پوړي چارواکي له لوري ورکول کيږي.
د پخواني ولسمشر حامد کرزي د واکمنۍ پر مهال امنيتي ځواکونو ته داسې دستور نه وو ورکړل شوی، بلکې ځينې ځانمرګي بريدګر د لوړ پوړو مقاماتو له لوري بېرته ازادېدل.
ولسمشر کرزي یو ۱۶ کلن ځانمرګی بریدګر د رسنيو په مخ کې ازاد کړ، چې بیا د پلازمينې کابل ولایت په استقلال لیسې کې د دویم ځل له پاره په ځانمرګي برید بريالي شو او زیات شمېر هنرمندان او عام افغانان يې ووژل.
د کورنيو چارو اوسني وزیر زياته کړه، چې د افغان امنيتي ځواکونو د پياوړتيا له پاره افغان حکومت پر نويو اقداماتو لاس پوری کړی.
