د کندوز ولایت سیمه ییز چارواکي وايي، چې د دې ولایت د دشت ارچي ولسوالۍ له نیمايي زیاته برخه د طالبانو په واک کې ده او یوازې د ولسوالۍ مرکز له امنیتي ځواکونو سره دی.
د دشت ارچي ولسوال نصیرالدین سعدي سلام وطندار ته وویل، چې وسله والو طالبانو له پرون ماښام راهیسې په دې ولسوالۍ درې ځلې تعرض کړی دی او د امنیتي ځواکونو له خوا په شا شوي دي.
د سعدي په خبره، په دې بریدونو کې ۳۵ طالبان وژل شوي او ۳۰ تنه یې ټپیان شوي دي.
د دشت ارچي ولسوال وايي، ځانګړي ځواکونه ولسوالۍ ته راغلي دي او پلان لري، چې نن شپه د طالبانو له خوا نیول شوې سیمې بېرته د حکومت په کنټرول کې کړي.
له بل لوري راپورونه وايي، چې د کندوز په کلای زال ولسوالۍ کې د امنیتي ځواکونو او طالبانو تر منځ سخته نښته روانه ده.
د کلای زال ولسوال محبوب الله سعیدي وايي، چې تراوسه مرکزي بازار او د ولسوالۍ ځینې برخې د طالبانو په لاس کې دي.
ولسوال زیاتوي، چې امنیتي ځواکونه د طالبانو ځواب له پاره پوره تابیا لري او ډېر ژر به په دې سیمه کې د طالبانو له خوا د نیول شویو سیمو د بیا واک له پاره عملیات وشي.
د کندوز امنیتي مسوولین وايي، چې په دې ولایت کې د یوې اونۍ په اوږدو کې ۷۵ طالبان وژل شوي او ۳۲ ټپیان شوي دي.
له بل لوري طالبان هم ادعا کوي، چې د کلای زال په نښته کې یې حکومت ته تلفات اړولي دي، خو حکومت یې ادعا ردوي.
