د سرپل ولایت سیمه ییز چارواکي وايي، چې وسله والو طالبانو پرون ورځ (چهار شنبه، د جون ۱می) غرمه مهال ۱۲ بجې له یو بس موټر نه ۲۵ مسافر د سانچارک په ولسوالۍ کې برمته کړي دي.
د دغه ولایت د امنیې قوماندانۍ ویاند علی اکبر اندرابي سلام وطندار سره په مرکه کې وویل، چې تر اوسه یې د تښتول شویو مسافرو د ساتنې ځای په اړه اطلاعات نه دي پیدا کړي.
اندرابي وايي، چې یرغمل شوي کسان ټول د بلخواب ولسوالۍ اوسېدونکي دي او د خلاصون په پاره یې هڅې پیل کړي دي.
په داسې وخت کې دغه کسان تښتول کېږي، چې دوه ورځې مخکې (د غبرګولي په ۱۱مه) د کابل ـ تخار په لویه لار د کندوز ولایت په شینه تپې سیمه کې وسله والو طالبانو ۱۷۵ تنه مسافر یرغمل ونیول، چې اوسمهال هم ۸ تنه برمته شوي مسافر له وسله والو طالبانو سره پاتې دي.
په کندوز کې د تښتول شویو مسافرو له ډلې وسله والو طالبانو ۱۲ تنه یرغمل شوي کسان ووژل او د راپورونو پر بنسټ پاتې کسان یې چهاردرې ولسوالۍ ته وړي دي.
