په افغانستان کې د ناټو عمومي قومندان جنرال جان کمپبل د امنیه قومندانانو له پاره د درې ورځني سیمینار په پېل کې وویل چې افغان امنیتي ځواکونه باید د جګړې راتلونکي فصل ته تیار اوسي.
کمپبل زیاته کړه چې امنیتي ځواکونه باید د ولایتونو په تېره بیا د هلمند له اوسنیو عملیاتو نه ګټه واخلي.
جنرال کمپبل له افغان ځواکونو د ناټو د ملاتړ او حمایت په اړه زياته کړه چې دوی په خپل قاطع ماموریت کې له افغانانو سره دي او کله به يې هم یواځې پرې نه ږدي.
دغه سیمینار چې د جان کمپبل په ګډون په کې د افغانستان اجرایه رییس عبدالله عبدالله، د کورنیو چارو وزیر نورالحق علومي، د ملي امنیت رییس رحمت الله نبیل، د دفاع وزارت سرپرست عنایت الله نظري او د ولایتونو امنیه قومندانانو هم موجود و، د پولیسو د روحیې د لوړولو او د امنیتي ارګانونو ترمنځ د همغږي په پیاوړتیا کې اغېزمن بلل کېږي.
اجرايو رییس عبدالله عبدالله په خپلو خبرو کې وویل چې له ځکمنۍ بشپړتیا د ملي اردو دفاع د خلکو د ارامي سبب کېږي او په خبره يې دی هیله من دی چې دغه سیمینار به د ملي اردو، پولیو او ملي امنیت ترمنځ د همغږي کولو سبب شي.
د کورنیو چارو وزارت نورالحق علومي په خپلو خبرو کې وویل چې په بې پرې ډول د قانون تطبیقول، په امینتي ځواکونو کې د مېرمنو ډېرښت، د پولیسو د ظرفیت لوړول، د سرحدي کرښو ساتنه، د مجازات او مکافات د اصل رعایت د نوموړي په کاري لومړیتوبونو کې ګڼل کېږي.
علومي وویل چې په هېواد کې د وسله والو مخالفینو او ورسره په څنګ کې د داعش د فعالیت پر وړاندې به دوی مقابله کوي او په خبره يې دی هیله من دی چې دغه سیمینار به د امنیتي ځواکونو د روحيې په لوړولو کې ښه اغېز ولري.
په دې مراسمو کې د دفاع وزارت سرپرست عنایت الله نظري او د کورنیو چارو وزارت مرستیال بصیر سالنګي هم خبرې وکړي.
بصیر سالنګي وویل چې امنیتي ځواکونه د دې وړتیا لري چې د هر ګواښ پر وړاندې وجنګېږي، ورسره جوخت د دفاع وزارت سرپرست نظري د ناټو له همکاري او ملاتړه مننه وکړه او ويې ویل چې دوی لا د ډېرو همکاریو غوښتونکي دي.
دا په داسې حال کې ده، چې په دې وروستیو کې د داعش نوي څرکونه ترسترګو شوي او دغو څرکونو ډیری خلک اندېښمن کړي هم دي.
یاده دې وي، څو ورځې وړاندې د کورنیو چارو وزارت مسولینو اعلام وکړ چې د داعش ډلې اړوند خبرونو کې رسنۍ باید احتیاط وکړي.
