د سیلوفابریکې مسوولان وايي، د سیلو دې فابریکې د غنمو د پاکولو، اوړه کولو او مینځلو تر څنګ د غنمو د ساتلو لهپاره ۴۰ کندوګان درلودل چې هر کندو يې د ۵۰۰ ټنو غنمو ظرفیت لرلو .
د دې فابریکې رييس قطب الدین رفیق له سلام وطندار سره د خبرو پرمهال وویل، د سیلو یادې فابریکې په ۲۴ ساعتونو کې ۱۲۰ ټنه غنم اوړه کول چې د همدې غنمو اوړه به د دولت ټولو نظامي او ملکي ادارو مامورینو ته د ارزاقو او یا هم د نورو تصديو او نانوايانو لهخوا په ډېره ارزانه بیه عرضه کېدل.
د ده په خبره، د خپلمنځیو جګړو پرمهال پرته له هغو وسایلو چې نه وړل کېدل نور ټول ټول وسایل چور شول.
ښاغلی رفیق وايي، د دې فاریکې د فعالیت پر مهال ۳۰۰ تنه په بېلابېلو څانګو کې دوه په کار بوخت وو چې اوس ۱۰ تنه پرسونل لري.
د کندهار د سیلو رییس زیاته کړه چې دوه کاله وړاندې د جهاني بانګ لهخوا د سیلو فاریکې د ترمیماتي چارو د سروې کارونه بشپړه شوي؛ خو معلومه نهده چې څه وخت به يې د ترمیماتې چارو عملي کار پیل شي.
د کندهارد اقتصاد ريیس ګلمحمد ارین په اقتصادي برخه کې د سیلو فعالیت د کروندګرو پر اقتصادي حالت باندې خورا مثبت ګڼي او وايي چې له یوې خوا د بېکارو خلکو لهپاره د کار زمینه برابروي او له بلېخوا د کروندګرو د حاصلاتو لهپاره مناسیب بازار بلل کي. د ده په خبره، د دې تر څنګ په دولتي چوکاټ کې د نظامې او ملکې مامورانو لهپاره ښه فرصت بولي چې له دې لارې لږ لګښت باندي غنم اوړه او یا هم ډوډۍ ترلاسه کولی شي.
ښاغلي ارین دا هم وویل چې د دومره لویې اقتصادي سرچینې د فعالیت په اړه يې هلې ـ ځلې شروع کړېدي چې بهرني او کورني مرستندویان ورته پیداکړي او پهدې ډول دا مهمه اقتصادي منبع ورغول شي.
د ده په وینا، د یادې سیلو جوړېدل به نه یوازې د کروندګرو ژوند ښه کړي او حلال کښت ته به يې وهڅوي ترڅنګ به یې ډېر ځوانان له جګړو راوګرځي.
په ورته وخت کې د کندهار پوهنتون د اقتصاد پوهنځي دوه تنه استادان هم د سیلوګانو فعالیت د هېواد په کچه د کرهنیزو محصولاتو ستراتیژیکه ذخیره بولي چې په اقتصادي بازارونو کې د حاصلاتو د عرضه کولو او تقاضا پرمهال تعادل رامنځته کوي او له اوسني حالته د دولت مصارفو کچه راکموي .
د يادونې ده چې په افغانستان کې د ۱۹۵۵ کالونو په اوږدو کې په کابل، کندهار، مزار، پلخمري او هرات ولایتونو کې د غنمو د ساتلو په موخه سیلوګانې فعاله شوې چې له یوي خوا دولت خپل عواید تر لاسه او له بلېخواد کروندګرو د حاصلاتو لهپاره مناسب بازار پیدا شي.
عام کندهاریان او کروندګر یو ځل بیا پهدې ولایت کې د سیلو فابریکې د فعالېدلو غوښتنه کوي.
