د کرنې سکتور کې د ښځو پرمختګ ته طرحه جوړه شوې

د کرنې، اوبولګونې او مالدارۍ وزیر نصیراحمد درانی وايي، د کرنې په سکتور کې به د ښځو پرمختګ له‌پاره عملي ګامونه اوچت شي.

ښاغلی درانی د هېواد په اقتصاد کې د ښځو رول مهم بولي. وايي، راتلونکی کال د کرنې په سکتور کې د ښځو پیاوړي کولو له‌پاره به، له ۱۷زرو او ۲۱۶ زیات د چرګانو فارمونه، ۲۷ زره او ۴۰۰ کورنۍ باغچې، یوزرو ۳۰ شنې خونې، د مرخېړیو د تولید او کښت ۱۰۰ مرکزونه جوړ کړي او د شاتو مچیو ۶۰۰ صندوقونه به ورته هم ووېشي.

دغه راز د هېواد لومړۍ مېرمنې بي بي ګل او د ښځو چارو وزیرې دلبر نظري د کرنې په برخه کې د ښځو رول په پیاوړي کولو او پراخولو ټینګار وکړ او ویې ویل، له ۶۶ سلنې زیاتې ښځې د کرنې په سکتور کې کار کوي.

د ښځو چارو وزیره د کرنې په برخه کې د فعالو مېرمنو له‌پاره د مالي سرچینو او بانکونو نه شتون له جدي ستونزو څخه بولي او وايي، د کرنې وزارت باید د ښځو د کاروبار پرمختګ له‌پاره اغېزناکه پروګرامونه ترلاس لاندې ونیسي.

د کرنې او اوبو لګونې وزارت چارواکي وايي، په تېرو څوو کلونو کې کروندګرو ښځو د چرګانو فارمونو، د شاتو مچیو، د تازه مېوو پروسېس، د شنو خونو او کورنیو باغچو جوړولو په برخه کې اړینې زده‌کړې لیدلي او له دې لارې یې د پام وړ ګټه هم ترلاسه کړې ده.