د لویې څارنوالۍ مسوولین وايي، چې د کابل ښاروالۍ ۱۱۰ تنه مامورین د قوانیونو د ماتولو په تور ممنوع الخروج اعلان شوي دي.
د دې ادارې ویاند عبدالبصیر عزیزي نن (دوشنبه) په کابل کې د فساد سره د مبارزې عدليي او قضايي مزکز په غونډه کې وویل، چې د دغو تورنو کسانو دوسیې د څېړلو لاندې دي او له دوی نه پلټنې روانې دي.
عزیزي زیاتوي، چې پر دغو کسانو د جرمونو له ثابتېدو وروسته به یې نومونه له رسنیو سره شریک شي.
د لویې څارنوالۍ ویاند ټول هغه راپورونه رد کړل، چې ګواکې د میدان وردګو امنیه قوماند خلیل اندرابي له هېواده تښتېلی دی.
دی وايي، چې اندرابي د څېړنو لاندې دی.
له دې مخکې ځېنو رسنیو داسې راپورنه خپاره کړي وو، چې خلیل اندرابي له هېواده تېښته کړې ده.
نوموړي وویل، چې له فساد سره د مبارزې عدلیي او قضايي مرکز چارې روانې دي، د ګومارنو او اداري کارونو له بشپړولو سره سم به فعالیت پیل کړي.
له فساد سره د مبارزې مرکز د لویې څارنوالۍ، د کورنیو چارو وزارت او د قضا څخه جوړه شوی دی.
دغه درې ارګانونه د فساد سره د مبارزې په برخه کې ګډ کار کوي.
