د ښارجوړونی وزارت د ښاري کانالیزاسیون او اوبو رسولو د لوی رییس انجنیر حمیدالله یلانی او دوو خصوصی شرکتونو ترمنځ نن په کابل کې څلورو ولایتونو ته د اوبو رسولو شبکو جوړولو تړونونه لاسلیک شول.
ښاغلي یلاني پهدې اړه جوړې شوې غونډې ته وویل چې د دې څلورو واړو پروژو لګښت د دولت له بودیجې ورکول کېږي.
ده زیاته کړه، د فاریاب مرکز میمنې ښار د اوبو رسولو پروژې شبکه ۸۹ کیلومتره اوږد والی لري چې د ادارې ودانۍ په ګډون به د اوبو څاګانې، زېرمه او اړین تجهزات ولري چې په ۱۸ میاشتو کې به د ۲۴۹ ملیونو افغانیو په لګښت بشپړه او ۷۸۰۰ کورنۍ به ګټه ترې برخمنې شي.
د ښاغلي یلاني په وینا، پهدې پروژو کې د پکتیا ولایت مرکز ګردېز ښار د اوبو رسولو شبکه شامله ده چې ۶۸ کیلومتره اوږدوالی لري، لګښت یې ۲۰۶ میلیونه افغانۍ اټکل او په ۲۰ میاشتو کې بشپړېږي چې ۴۵۰۰ کورنیو ته یې ګټه رسېږي.
د لوګر مرکز پلعلم د اوبورسولو شبکې دویم فاز درېیمه پروژه ده چې ۳۱ کیلومتره اوږده او لګښت یې څه د پاسه۸۲ میلیونه افغانۍ اټکل شوی چې په ۱۸ میاشتو کی به بشپړه او ۳ زره کورنۍ به ترې ګټنه وکړي.
ښاغلی یلانی همداراز وویل چې د کابل ښار شاهشهید د اوبو رسولو شبکه ۲۸ کیلومتره اوږدوالی لري چې لګښت یې څه دپاسه ۸۴ ملیونه افغانۍ اټکل شویدی.
د چارواکیو په وینا، د کابل ښار لهپاره اوسنۍ اوبه بسنه نهکوي؛ نو ځکه خو د شاتوت بند د مطالعې او سروې چارې اعلان ته وړاندې شوېدي.
دوی وایي، د شاتوت بند د پروژې پلي کولو لګښت۱۵۰ میلیونه ډالر اټکل شوی چې نړۍوال بانک پر غاړه اخېستی دی.
