نن ماسپښین شاوخوا یوه نیمه بجه د اداري اصلاحاتو او ملکي خدمتونو د کارکوونکیو پر موټر د کابل د دارالامان پر سړک چاودنه وشوه.
د کورنیو چارو وزارت ویاند نصرت رحیمي وايي چې یاده چاودنه د یوه چسپکي ماین له کبله وه چې مخکې له مخې په موټر کې ځای پرځای شوی و.
د عامې روغتیا وزارت ویاند وحیدالله مایار وايي چې په یاده چاودنه کې د اداري اصلاحاتو او ملکي خدمتونو ۵ کارکوونکي وژل شوي او ۱۰ نور ټپیان دي.
تراوسه هېڅ وسلهوالې ډلې د دغه برید مسوولیت نهدی منلی.
دا په داسې حال کې ده چې تېره ورځ هم په کابل کې څلور چاودنې وشوې چې درې یې پرلهپسې د پنځمې امنیتي حوزې اړوند د سیلو پر سړک پر محصلانو، عامو خلکو او خبریالانو وشوې او بله هم په پلسوخته سیمه کې د ټاکنو خپلواک کمېسیون په یوه موټر کې د ځای پرځای شوي چسپکي ماین له کبله وشوه.
په یادو چاودنو کې چې د چسپکي او ځای پرځای شویو ماینونو له کبله وې، ۲ کسان ووژل شول او ۲۷ نور ټپیان شول. د یادو چاودنو مسوولیت داعش ډلې پر غاړه واخیست.
د هېواد په بېلابېلو سیمو کې له وروستیو بریدونو سره هممهال په افغانستان کې د ملګرو ملتونو ځانګړي استازي تدامیچي یاماموتو نن د کوچني اختر په مناسبت په یوه پیغام کې د جګړې له ښکېلو خواوو غوښتي چې جګړه او تاوتریخوالی ودروي، څو افغانان په ارامه فضا کې اختر ونمانځي.
