د کابل د ولایتي شورا د غړي فواد صدیقي اوو ساتونکو د خورشید خصوصي ټلوېزیون مسوول رفېع صدیقي وهلی ډبولی دی.
د خورشید ټلوېزیون مسوول وايي، فواد صدیقي د خلکو د کورونو په منځ کې لوړپوړې ودانې جوړوي او په دې سیمه کې د ودانۍ جوړولو هېڅ جواز نه لري.
رفېع صدیقي وايي، دا موضوع یې له مسوولانو سره شریکه کړې، خو په وینا یې، هېڅ ځواب یې نه دی ترلاسه کړی او د زورواکۍ په پایله کې لانجه وهلو ډبولو او شکنجې ته رسېدلې ده.
د کابل د څلورمې ناحیې رییس سمېعالله سمسور هم تاییدوي چې یاده لوړپوړې ودانۍ په ناقانوني ډول او د ښاروالي له جواز پرته جوړېږي. نوموړی وايي، د څلورمې ناحیې له لوري دوه اوونۍ وړاندې د یادې ودانۍ کارونه درول شوي وو، خو بېګاه یې په ناقانونه توګه بیا پیل کړي دي.
خو د کابل د ولایتي شورا غړی فواد صدیقي دا ادعا ردوي او وايي، د دغې ودانې له جوړېدو مخکې یې له ناحیې نه اجازه اخیستې او رفېع صدیقي یې د جوړولو په بدل کې د کور له خاوند نه ۱۰ ډالر غوښتي دي.
پر ټولنیزو رسنیو خپرې شوې ویډیوګانې ښيي د کابل د ولایتي شورا غړی فواد صدیقي د خورشید ټلوېزیون پر مسوول برید کوي او وهل ډبول ورکوي.
