د کابل د رایو له بیا شمېرلو د مدني فعالانو ملاتړ

یوشمېر مدني بنسټونو، کابل ښاریانو او د سیاسي ګوندونو استازیو نن د یوې غونډې په جوړولو د کابل د ولسي جرګې ټاکنو د رایو بیاشمېرلو پروسې د پیل ملاتړ وکړ.

یاد بنسټونه د رایو بیاشمېرلو پروسې د ملاتړ ترڅنګ د دې پروسې پر روڼتیا او د کمېسیونو د مسوولانو له لوري په‌کې پر نه لاس‌وهلو ټینګار کوي.

مدني فعال مهدي مدبر پر ټاکنیزو کمېسیونو غږ کوي چې ژر تر ژره د کابل په ګډون، د ټولو ولایتونو پایلې اعلان کړي او افغانان تر دې زیات په تمه نه‌کړي.

دغه راز د غونډې ګډونوالو د پرېکړه‌لیک په یوه برخه کې لیکل شوي چې په بشپړې روڼتیا سره د ولسي جرګې ټاکنو د پایلو اعلان به په ولسمشریزو ټاکنو کې د خلکو له پراخ ګډون سره مرسته وکړي.

دا په داسې حال کې ده چې د ټاکنیزو شکایتونو کمېسیون څو ورځې وړاندې د کابل ولایت د ولسي جرګې په ټاکنو کې د پراخو درغلیو له کبله د دغه ولایت سل سلنه رایې باطلې اعلان کړي، خو د ټاکنو کمېسیون د یاد کمېسیون پرېکړه احساساتي او ناقانونه وبلله.

تر دې وروسته په کابل کې د ولسي جرګې ټاکنو د رایو سرنوشت په اړه د حکومت او دواړو کمېسیونو په ګډه غونډه کې پرېکړه وشوه چې د شکایتونو کمېسیون له خپلې پرېکړې شاتګ وکړ او د ټاکنو کمېسیون یې دوه ورځې وړاندې د بیاشمېرلو خبر ورکړ.