د پوهنې او مخابراتو او معلوماتي ټکنالوژۍ وزارتونو چارواکیو نن په کابل کې د خبري غونډې پرمهال د مبایل له لارې د هېواد د ښوونکیو د معاشونو د ورکړې هوکړهلیک لاسلیک کړ.
د دې هوکړهلیک لهمخې، لهدې وروسته به د هېواد د ښوونکیو معاشونه د مبایل له لارې د ورلېږل کېږي.
د پوهنې وزارت سرپرست میرویس بلخي وایي چې د مبایل له لارې د ښوونکیو د معاش ورکړه د شفافیت او د هغو د حقوقو د ورکړې چارې چټکوي.
د ښاغلي بلخي په خبره چې په لومړي ګام کې د پوهنې وزارت به ډېټابیس د بایومټریک په موخه د مخابراتو او معلوماتي ټکنالوژۍ وزارت ته په واک کې ورکړي.
د مخابراتو او معلوماتي ټکنالوژۍ وزیر شهزاد اریوبي وویل چې قراردادي مخابراتي شرکت د ښوونکیو د معاشونو د لېږدولو په بدل کې یو اندازه پیسې اخلي.
د ښاغلي اریوبي په وینا، پخوا تر دې د مبایل له لارې د معاشونو د ورکړې چاره ارزول شوېده او دغه ارزونه مو بریالۍ وه.
د مخابراتو او معلوماتي ټکنالوژۍ وزیر زیاته کړه، دغه چاره په لومړي سرکې په څو محدودو ولایتونو کې پلي کېږي او بیا به نور افغانستان ته وغځېږي.
د پوهنې وزارت چارواکي دا هم وايي چې د مبایل له لارې د معاش ورکړه؛ خیالي ښوونکي معلوموي او د دې فساد په مخنیوي کې ګټور تمامېږي.
د هوکړهلیک لهمخې، دغه چاره د روشن او افغان بېسیم شرکتونو له لارې پلې کېږي.
