رویټرز خبري اژانس په نوي راپور کې د ایران چابهار بندر د پراختیا لهپاره د غربي شرکتونو تجهیزاتو له نه پلورل کېدو خبر ورکړی.
دغه اژانس د یادې ستونزې لامل پر ایران د امریکې د بندیزونو او بانکي محدودیتونو دوام بولي.
دغه راز هندي چارواکو هم رویټرز ته ویلي دي، چې نامطلوب بانکي وضعیت د چابهار بندر په چارو کې د کار درېدو لامل شوی دی.
په ورته وخت کې د افغانستان د سوداګرۍ او صنایعو خونې چارواکي د رامنځته شوي وضعیت په اړه د اندېښنې په ښودلو وایي، د چابهار بندر د چارو د درېدو په صورت کې به د افغانستان له ۱۰۰ زیاتو شرکتونو پانګونې په سیند لاهو شي.
د سوداګرۍ او صنایعو خونې ویاند صیام الدین پسرلي سلام وطندار ته وویل، د چابهار بندر د کار درېدل د دې لامل کېږي، چې افغان سوداګر یو ځل بیا پاکستان ته مخه کړي او له اسلام اباد سره خپلې اړیکې ښې کړي.
د سوداګرۍ او صنایعو خونې د ویاند پرخبره، چابهار بندر له جنوبي اسیا هېوادونو سره د افغانستان د نښلولو لهپاره دپاکستان بدیل دی او د دې سوداګریز بندر د چارو درېدل افغانستان له زیاتو ستونزو سره مخ کوي.
پسرلي زیاته کړه، چې پر ایران د امریکې بندیزونو او د چابهار بندر د کارونو بندېدل د افغانستان پر سوداګرۍ ۵۰ سلنه منفي اغیز لري.
خو د سوداګرۍ او صنایعو وزارت ویاند مسافر قوقندي سلام وطندار ته وویل، چې اوسنۍ ستونزې د هند او ایران ترمنځ د اختلافونو له امله دي او افغانستان په دې کار کې رول نه لري.
قوقندي وايي، هر څومره چې په چابهار بندر کې اسانتیاوي رامنځته شي د افغانستان په ګټه دی.
د افغانستان، ایران او هند ترمنځ د سوداګرۍ درې اړخیز هوکړه لیک په ۱۳۹۵ کال کې د درې واړو هېوادونو مشرانو په ګډون په تهران کې لاسلیک شو.
