د ټاکنو خپلواک کمېسيون مشر احمد یوسف نورستاني وايي، چې د ولسي جرګې ټاکنو نه ترسره کېدو پرمخ لوی خنډ د مالي امکاناتو نه شتوالی دی.
نوموړي زياته کړه، دوی د تخنيکي پلوه هيڅ ستونزه نه لري او په وينا يې که چېرې مالي امکانات د دغه کمېسيون په واک کې ورکړل شي، نو پنځه میاشتې وروسته به د ولسي جرګې ټاکنې ترسره کړي.
نوموړي دا څرګندونې د ولسي جرګې په تالار کې وکړې.
د ټاکنو خپلواک کمېسيون مشر نن دوشنبه (۲۰۱۵ زېږدیز/مې۱۸) د ولسي جرګې د غړو له لوري د ټاکنو په وخت نه ترسره کېدو په باب د وضاحت په موخه راغوښتل شوی و.
که څه هم شاوخوا نهو وکيلانو په دې اړه جدي مخالفت څرګند کړ او د نوموړي تالار ته د راننوتو سخت مخالفین و، خو بیا هم د ولسي جرګې د لومړي مرستيال له سختو ویناوو وروسته نوموړي ته تالار ته د ننوتو اجازه ورکړل شو.
د کمېسیون مشر وویل، چې له تخنیکي پلوه دوی بشپړ چمتووالی لري او که مالي امکانات ورته برابر شي، نو دوی به له ژمي وړاندې ټاکنې ترسره کړي.
احمد یوسف نورستاني د ولسي جرګې غړو ته زياته کړه، چې د ټاکنو د کمېسيون دنده د تخنيکي او لوجیستيکي امکاناتو برابرول دي.
نوموړي د ټاکنو په وخت نه ترسره کېدو يواځنې مسوول حکومت په ګوته کړ.
دا په داسې حال کې ده، چې د افغانستان اساسي قانون ۸۳ مې مادې د لومړي بند په دويمه فقره کې راغلي، چې " د ولسي جرګې د کار دوره د پنځم کال د چنګاښ په لومړۍ نېټه د ټاکنو د پایلو له اعلان وروسته پای ته رسېږي او نوې شورا په کار پیل کوي او همدا راز د ولسي جرګې د دورې ترختمېدو د مخه له دېرشو څخه ترشپيتو ورځو په موده كې د ولسي جرګې د غړیو انتخابات كېږي."
نورستاني تېرو ولسمشريزو ټاکنو ته هم اشاره وکړه او زياته يې کړه، چې د رایو ورکوونکو د نوملړ په نشتوالي که هیڅ راز رڼې ټاکنې نه شي کېدای.
هغه دا هم وویل، چې د تېرو ټاکنو سل سلنه تفتیش او بیا پلټنه بې ځایه و.
د ټاکنو خپلواک کمېسيون مشر د بهرنیو مرستو د بندېدو په اړه وویل، چې له دې سره به ۸۵۰ مسلکي مامورین له لاسه ورکړي.
نورستاني وکیلانو ته وویل، چې د ولسي جرګې د ټاکنو له پاره یې ولسمشر ته د تېر کال د عقرب میاشې په ۱۵ نېټه یوه طرحه د زماني مهالویش سره سم وړاندې کړه.
د نورستاني په وینا ولسمشر د وړاندې شوې طرحې په ځواب کې د وخت اخیستلو غوښتنه وکړه او د زیاتو فرصتونو له لاسه ورکولو سره سره د ټاکنو خپلواک کمېسیون ځواب تر لاسه نه کړ.
نورستاني د ولسي جرګې غړو ته وویل، موږ هوډ لاره چې د ولسې جرګې ټاکنې روان زېږدیز کال د ثور ۲ مه پیل شي.
ده زیاته کړه، دغه طرحه په ۶۶ مخونو کې ترتیب شوې وه، چې او په دې طرحه کې د ټاکنو په کمېسیون کې د سمون راوړلو او نورو اصلاحي برخو هم کار شوی و.
د ټاکنو د خپلواک کمیسیون رییس د خلکو استازو ته وویل چې یاد کمیسیون د ټاکنو د پیلېدو له پاره بشپړ تخنیکي او مسلکي چمتووالی لري.
نورستاني د ټاکنو د ځنډ په برخه کې څلور لاملونه ته اشاره وکړه، چې د ده په خبره د ټاکنو د ځنډ په برخه کې لومړی بودیجوي ستونزه دویم په ټاکنیز نظام کې د سمون کمېسیون ریفورم درېیم د اجرایه قوي عدم اراده او په څلورمه برخه کې د نړیوالې ټولنې د مرستو بندېدل دا هغه لاملونه دي، چې د ټاکنو د پېلېدو پر وړاندې ستونزې پېداکړي دي.
ياده دې وي، چې روان پارلماني ټاکنې ۸۰ میلیونه ډالر لګښت لري او دغه بودیجه د تېر کال د ټاکنیزو جنجالونو د تفتیش په برخه کې مصرف شوه او د ټاکنو د کمېسيون د چارواکو په وينا دمګړۍ د دغه لګښت له پاره بودیجه په واک کې نشته.
