د راپورونو پر اساس پر دشت ارچي ولسوالۍ له پرون راهیسې طالبانو له درې لورو برید کړی و.
د دشت ارچي ولسوال نصرالدین سعدي سلام وطندار ته وویل، چې دولتي ځواکونه نن سهار شاوخوا ۷ بجې د ولسوالۍ له بازاره راوتلي دي.
د سیمې اوسیدونکو دا خبره مني او وايي، چې وسله وال طالبان د ولسوالۍ بازار ته ننوتي دي.
په دې وسله والو نښتو کې دواړو لورو او ملکي وګړو ته د اووښتې مرګ ژوبلې په اړه مالومات نه دي خپاره شوي.
په دې اړه د طالبانو ویاند ذبیح الله مجاهد د خپلې ډلې په انټرنيټي پاڼه کې ليکلي، چې د دشت ارچي ولسوالۍ یې سره د ۱۴ امنيتي پوستو تر خپلې ولکې لاندې راوستي دي.
نوموړي ادعا کړې، چې د بريد په پایله کې يې ۲۸ پولیس او اربکيان وژلي دي.
همدارنګه ذبیح الله مجاهد ليکلي، چې د افغان ځواکونو څخه يې ۸ چاينه ټانکونه، ۱۲ عرادې رينجر موټر، ۳ عرادې سراچه او ۱۳۰ ميله سپکې او درنې وسلې د دوی لاس ته ورغلي دي.
ذبیح الله مجاهد، چې ځان د طالبانو ویاند بولي په خپله انټرنيټي پاڼه کې کاږلي، چې د جنګ په پای کې يې ۲ طالب وسله وال وژل شوي او ۶ نور ټپيان دي.
ياده دې وي، چې تر اوسه په دې اړه د کورنيو چارو یا ملي دفاع وزارتونو له لوري څه نه دي ویل شوي.
د ويلو ده، چې دوې ورځې مخکې د کندز چاردرې ولسوالۍ هم طالبانو نیولې، خو امنیتي چارواکي بیا وایي، چې د هغې ولسوالۍ بیرته نیولو په موخه يې پوځي عملیات پېل کړي دي.
