د غزني د والي ویاند جاوید سالنګي سلام وطندار ته وویل، چې د کندهارـ کابل لويې لارې ۹ تښتول شویو مسافرو له ډلې ۶ تنه يې نن سهار (جمعه جون ۱۰مه) بېرته ازاد شوي دي.
جاوید سالنګي د دغو کسانو د هویت په اړه څه نه وايي، خو ټينګار کوي، چې دغه مسافر پرته له کومې معاملې خوشې شوې دي.
خو د غزني د سولې عالي شورا رییس خلیل هوتک وايي، چې خوشې شوې مسافر ټول د امنیتي ځواکونو په لیکو کې دندې سرته رسولي، چې د سولې عالي شورا او قومي مشرانو په منځګړیتوب ازاد او بېرته کابل ته لېږدول شوي دي.
همدارنګه هوتک وايي، د "ناني" له کلي نه هم ۴ تنه تښتول شوي دي او زیاتوي، چې دغه خلک تېره ورځ (پنجشنبه جون ۹مه) د کندهار ـ کابل لويې لارې څخه تښتول شوي دي.
خو په دې اړه بیا د غزني د پوځ ویاند او د یاد ولایت امنیه قوماندان وايي، چې دوی ته تراوسه په دې اړه کره جزیات نه دي رسېدلي.
