د افغان حکومت کابینه بشپړ شوه، خو لا هم د ملي دفاع وزارت چارې ځای ناستی وزیر پر مخ وړي.
تر دې دمه د ملي دفاع وزارت لپاره ستر جنرال شېر محمد کريمي، ډګر جنرال محمد افضل لودین او دغه راز، درې ورځې وړاندې معصوم ستانکزی چې ولسي جرګې ته د ملي دفاع نوماند وزیر په توګه ورپيژندل شوی و؛ رد شوي دي.
پوځي شنونکي وایي، چې د ملي د فاع وزارت په قانون کې د ځای ناستي وزیر لپاره د صلاحیتو او واکونه نه دي روښانه شوي.
پوځي کارپوه جنرال عتیق الله امرخېل د (جولای په ۷مه) سلام وطندارته وویل، چې په دغه وزارت کې سرپرستۍ ته دوام ورکول؛ د جګړې پر وړاندې د پوځیانو روحیه کمزور کوي، د سرپرست او امر نه منل کېږي او په ټوله کې ملي پوځ زیانمېږي.
هغه زياته کړه، چې د دفاع وزیر په تعلیم نامو او اصول نامو کې دندې په بشپړ توګه معلومې دي، خو د هیڅ ځای ناستي وزیر مسولیتونه او دندې نه دي روښانه شوي.
جنرال امرخېل دا هم وویل، چې د ملي فاع او کورنیو چارو وزیرانو تر څنګ د ملي امنیت لوی رییس په ټاکنه کې باید ولسي جرګه ډېر واکونه ونه لري.
خو د حکومت اجرایه ریاست بیا وایي، چې د ملي د فاع وزارت لپاره د نوي وزیر پر سر ولسمشر او اجرایه رییس تر دې دمه رسمي خبرې نه دي پیل کړي.
د اجرایه ریاست مرستیال ویاند جاوید فیصل وایي، د نوي وزیر تر ټاکنې پورې د ملي د فاع لپاره ځای ناستی معصوم ستانکزی د دغه وزارت سرپرستي پر غاړه ولري.
جاويد فیصل زیاته کړه، حکومت په دې کار کوي، چې ژر بل مناسب شخص د دې پوسټ لپاره پيدا کړي، ځکه چې په وينا يې اوسمهال افغانان له زیاتو امنیتي ننګونو سره مخ دي.
بل خوا د ولسي جرګې یو شمېر غړي وایي، چې ملي دفاع وزارت له ګڼو ستونزو سره مخ دی او له ولسمشر غوښتنه کوي، چې یو مناسب شخص ولسي جرګې ته د تایید رایې اخیستلو په موخه وروپېژني.
صالح محمد وايي، چې ولسمشر او اجرایه رییس دې خپل منځي اختلافات د ملي دفاع وزیر په اړه پای ته ورسوي او په اوسنیو شرایطو برابر مسلکي شخص دغه وزارت ته وټاکي.
دا په داسې حال کې ده، چې د هېواد په یو شمېر ولایتونو کې جګړو زور اخیستی او د کتونکو په اند، له دې زیات د دغه وزارت بې وزیره پاتې کېدل به په هېواد کې نورې ستونزې هم وزیږوي.
