یو شمیر پوځي شنونکي باوري دي، چې د امنیتي مسوولینو ناسم مدیریت له امله د کندوز ښار ځینې برخې طالبانو ونیولې.
د پوځي چارو شنونکي عمر عیار سلام وطندار ته وویل، طالبانو ددې له پاره، چې په بروکسل کنفرانس کې افغان حکومت د امنیت په ټینګښت کې نړیوالې ټولنې ته ناکام وښيي پر کندوز برید وکړ.
د عیار پروینا، په کندوز کې کافي دولتي سرتیري شته او ددې له پاره چې په سمه توګه مدیریت نه دی شوی د کندوز ښار ځینې برخې طالبانو نیولې و.:
په همدې حال کې د پوځي چارو بل شنونکی مرزا محمد یارمند وايي، چې کندوز ښار ته د امنیتي مسوولینو لږ پام او د دغه ولایت ولسوالیو ته د هغوی زیاته پاملرنه ددې فاجعې سبب شوی دی.
یارمند زیاته کړه، که حکومت غواړي چې طالبان له منځه یوسي لومړی باید د کندوز خلکو په منځ کې د طالبانو ریښې له منځه یوسي.
دغه راز، د پوځي چارو شنونکي عتیق الله امرخیل سلام وطندارته وویل، چې د طالبانو له تحرکاتو د امنیتي ځواکونو نا خبريو ددې ډلې پیاوړتیا د کندوز ښار ځینو برخو سقوط سبب شوی دی.
خو په ورته وخت کې امنیتي بنسټونو وايي، چې طالبانو له ښاره کورونو کې پت شوي او له امنیتي ځواکونو سره د مخامخ کیدو توان نه لري.
د کورنیو چارو وزارت ویاند صدیق صدیقي د سې شنبې ورځ خبري غونډې ته وویل، چې د کندوز ښار پاکولو له پاره د امنیتي ځواکونو عملیات روان دي او تراوسه پورې يې لومړۍ، دویمه او درېیمه ناحیه له مخالفینو پاکه کړې ده.
له دې ټولو سره سره، د سیاسي ګوندونو خونې، ټولنیزو او مدني بنسټونو نن په کابل کې خبري غونډې ته وویل، چې طالبانو په بروکسل غونډه کې د حکومت کمزوري ښودلو په موخه پر کندوز برید کړی او امنیتي ځواکونو هم پر خپل ټول توان له کندوزه دفاع کړې.
