د پښو په ګوتو نقاشي شوي هنري اثار

شایسته معلوله ده. نوموړې خبرې نه شي کولی او حتا په لار د تګ توان نه لري؛ خو د پښو په ګوتو نقاشي کوي. د شایستې د مور په خبره کوچنۍ وه، چې له زانګو راوولېده او له هغې پېښې راورسته ګونګۍ او معلوله شوه.

د شایستې مور وايي، لور یې له ۵ کلنۍ راهیسې قلم د پښو په ګوتو نیسي او د نقاشۍ هنر ته یې مخه کړې.

نن په هرات کې د مارچ ۸ په مناسبت یو نندارتون جوړ شوی و.

په دې نندارتون کې ۸۰ هنري اثار د هراتۍ مېرمنو له خوا او ۱۶ هنري نقاشي شوي اثار د شایستې نندارې ته اېښودل شوي وو.

مینه‌وال او ننداره کوونکي په دې باور وو، چې د شایستې په ګوتو نقاشي شوي اثار د یو چا د زړه کیسې او هیلې انځور کړي دي.