په پام کې ده، چې د پوهنې وزارت په راتلونکي کال کې د ۲۵ میليونو ډالرو په لګښت ۵۰ میلیونه جلده کتابونه چاپ کړي.
د پوهنې وزارت چارواکي د دغه وزارت دپخوانيو مسولینو د تعلیمي نصاب د بې کېفیاتۍ په تړاو نیوکه وکړه او ویي ویل، چې دوی پخوا د زده کوونکو له پاره بې کېفيته او له املايي تېروتنو ډک کتابونه چاپ کړي دي.
د پوهنې وزیر اسدالله حنیف بلخي، چې نن پنجشنبه ( فبروري۲۵مه) بلخ ولایت ته ورغلی و د یو شمیر سیمه ییزو چارواکو په ګډون یې غونډې ته وویل، چې تعلیمي نصاب د پوهني له اساساتو څخه دی او په تېرو څو کلونو کې دغې برخې جدي پام نه دی شوی.
نوموړي زیاته کړه، چې په ۲۰۱۶ م ز کال کې د ۵۰ میلیونه جلده کتاب چاپولو ته اړتیا شته او دا به د ۲۵ میلیونو افغانیو په لګښت چاپ شي.
ده دا هم وویل، چې په راتلونکي کال کې به په کتابونو کې املايي تېروتنې هم سمې کړي.
د پوهنې وزیر زیاته کړه، تیرکال د کتابونو په ترتیب او تدوین کې د چټکې له امله ۲۵ میلیونه جلده کتابونه له املايي او انشايي تیروتنو سره چاپ شوي دي.
د پوهني وزیر وویل، چې په وزارت کې پېسې شته خو د لګولو له پاره يې ظرفیت نشته.
د بلخي پروینا، د پوهنې وزارت سره ۵۵،۷ میلیونه ډالره مرسته شوې، خو د ظرفیت نشوالي له امله یوازي ۱۹ میلیونه ډالره يي لګیدلي دي.
