د ولسي جرګې ځېني غړي وايي، چې د فرخندې قضیه هغه ډول نه ده څنګه چې په رسنيو کې ښودل کيږي.
دوي زیاتوي، چې دغه قضیه ځېنې نورې پټې خواوې هم لري.
نن یک شنبه (۲۰۱۵م / مارچ ۲۹) د ولسي جرګې د کورني امنیت د کمېسیون غونډې ته، امنیتي چارواکي وربلل شوي وو، چې د فرخندې د وژنې په اړه وکیلانو ته وروستي معلومات ورکړي.
په دغه غونډه کې ځينو وکيلانو وویل، هر هغه څه چې په رسنیو کې د فرخندې د وژنې په اړه په دې وروستيو کې خپاره شوي دوی ورته د شک په سترګه ګوري.
وکيلان وايي، رسنۍ په خپلو راپورونو کې فرخنده بشپړه بې ګناه بللې.
د دې جرګې یو تن غړي حاجي کرام الدین رضا زاده وویل، داسې هم ویل کیږي چې دا له واقعیته لرې خبره ده، چې ګوندې فرخنده هغه مهال د شاه دو شمشيره په زیارت کې د ناوړه او اسلام ضد دود مخه نيوله.
نوموړي زیاته کړه داسې اوازې هم شته، چې فرخنده د ځينو بهرنيو سفارتونو سره اړيکې درلودې او دغه کار يې د همغو سفارتونو په امر کړی.
رضا زاده وايي، چې د فرخندې د قضيې په اړه باید جدي تحقیقات وشي، څو بې ګناه وګړو ته په کې زيان ونه رسيږي.
دې غونډې ته د ارشاد، حج او اوقافو وزیر فېض محمد عثماني هم وربلل شوی وو هغه وویل، چې دا یوه دسیسه وه او قران شریف ته اور نه دی ورته شوی.
خو د ولسي جرګې غړي حاجي عبدالاحمد دراني بیا د وزير له خبرو سره مخالفت وښود او ويې ويل، چې دوی د ټلويزيون له لارې د سوځېدلو پاڼو تصویرونه وکتل، خو د نوموړي په وينا دا لا معلومه نه ده، چې هغه قران شریف و او که بل څه!؟
د نوي ۱۳۹۴ م لمريز کال د پېل څخه دوې ورځې وړاندې په رڼا ورځ د کابل ښار په منځ کې د شاه دوشمشېره جومات مخې ته، د یو شمېر کسانو لخوا فرخنده لومړی په ډبرو او څوباړو ووژله او وروسته یې د دې ۲۷ کلنې پیغلې جسد و سوځاوه.
خو د دغو وکیلانو څرګندونو ته د کورنیو چارو وزیر نورالحق علومي په ځواب کې وویل، چې د فرخندې د قضيې په اړه ډیرې پلټنې شوي دي او په دې اړه ټولو تورنو کسانو، پرته له کوم زور زیاتي په خپل جرم اعتراف کړی.
د علومي په وينا، فرخنده د یو شمېر خلکو د ناوړه احساساتو قرباني شوه.
نوموړي د فرخندې د وژلو په باب د وکيلانو تورونه هم رد کړل.
د کورنيو چارو وزیر زياته کړه، چې " کشفي ارګانونو داسې سند نه دی ترلاسه کړی چې له مخې يې فرخنده له کوم سفارت سره اړیکې ولري. "
په همدي حال کې د فرخندې د پيښې په اړه د ولسي جرګې د حقیقت موندنې د پلاوي غړې فوزیې کوفي هم د وکیلانو شکونه او اندېښنې ځواب کړې او د ټېلفوني اړیکې په اړه يې وویل چې د فرخندې ورستۍ اړیکه له خپلې خور سره نیول شوې او خور یې ورته کورته د ژر ورتګ سپارښتنه کړې.
د فرخندي وژني په ملي اونړيواله کچه پراخ غبرګونونه را وپاورول او په هېواد کې دننه په بېلابېلو ولایتونو پراخ لاريونونه هم وشول.
څو ورځې وړاندې په پلازمېنه کابل کې د فرخندې د وژلو په غبرګون لاریون وشو او دغه زرګونه لاريون کوونکي د فرخندې د وژلو عاملانو ته د اعدام سزا ورکولو غوښتونکي شول.
