نن د افغانستان د صنایعو ټولنې، د کار او ټولنیزو چارو، د سوداګرۍ، کانونو او مالیې وزارتونو، د برېښنا شرکت رییس او کابل ښاروالۍ چارواکیو په ګډه سره د صنعتي کارخانو د ستونزو په اړه ناسته جوړه کړه.
د افغانستان د صنایعو ټولنې عمومي مشر سخياحمد پیمان د نورو ستونزو تر څنګ په صنعتي پارکونو کې د برېښنا کمښت د فابریکه لرونکو لویه ستونزه وګڼله.
ښاغلی پیمان وایي چې اوسمهال د کابل په صنعتي پارکونو کې تولیدي کارخانې ۱۴۰ مېګاواټه برېښنا ته اړتیا لري.
د افغانستان د صنایعو ټولنې عمومي مشر دا هم وویل چې د ژمي په رارسېدلو او د برېښنا په پرچاوي سره به د پلچرخي په صنعتي پارک کې د تولیدي کارخانو برېښنا ظرفیت ۵۰سلنه راکم شي.
خو د برېښنا شرکت مشر امانالله غالب چې په غونډې کې یې برخه لرله؛ د ځېنو فابریکهلرونکیو له لوري د مصرف شوې برېښنا د پيسو نهورکول، په تولیدي کارخانو کې د لوړ ظرفیتلرونکیو ټرانسفرمرونو نصبول او د دې ستونزو د هواري په موخه د صنعتي پارکونو د مسوولانو نه مرسته؛ د کابل په تولیدي کارخانو کې د برېښنا د کمښت اصلي لاملونه په ګوته کړل.
د برېښنا شرکت مشر وایې، د هغه جدول لهمخې چې د برېښنا شرکت سره موجود دي؛ همدا اوس د صنعتي پارکونو د برېښنا مصرف ۷۰ میګاواټه ده؛ خو د ۱۰۰ مېګاواټه غوښتنه کېږي.
له دې سره ـ سره د افغانستان د صنایعو ټولنه بیا وایي چې په ټول هېواد کې تولیدي کارخانې ۷۰۰ مېګاواټه برېښنا ته اړتیا لري.
د صنعتکارانو په خبره؛ د صنعتي پارکونو لهپاره د ځمکې د وېش، د اومه توکیو واردول، د معیاري بېخبناوو او کانالیزاسیون نهشتوالی هغه ستونزې دي چې صنعتکاران ورسره لاس او ګرېوان دي.
