پاکستاني حکومت پرېکړه کړې، چې د دغه هېواد په ټولو لویو ښارونو او تجارتي مرکزونو کې د افغان کډوالو له خوا اخیستل شوي جایدادونه او ځمکې لیلام ته وړاندې کړي.
د پاکستاني رسنیو د راپورونو له مخې د پاکستان د پنجاب ایالت په لوی ښار لاهور کې د هغو ځمکو او جایدادونو لېست چمتو شوی دی، چې د افغان کډوالو په نوم لیکل شوي دي.
راپورونه لیکي، چې په دغو ليلامېدونکو ځمکو کې د ګلبرګ، راوي سړک، د امین پارک سیمې او د ښار په منځ کې یو اندازه ځمکې شاملې دي.
پاکستان د خپل ملي عملي پلان پر اساس امر کړی، چې په دغه هېواد کې دې د افغان کډوالو په پېژندپاڼو کې نېټې نه غځول کېږي.
همدا ډول د پاکستان مرکزي حکومت ایالتي حکومتونو ته سپارښتنه کړې، چې د کډوالو پېژندپاڼو کې د نېټې نه غځولو ترڅنګ، د دوی د خپل خپلوانو او کارو بار په اړه بشپړ جزیات هم له اړوندې کمېټې سره شریک شي.
د پاکستاني رسنيو د راپورونو پر اساس تر اوسه پورې د ۱۱ سوو هغو جایدادونو لېست چمتو شوی، چې د افغان کډوالو په نوم ثبت او راجسټر دي.
په همدې حال کې د افغانستان د بهرنيو چارو وزارت وايي، چې دوی هم داسې راپورنه تر لاسه کړي، چې ویل کېږي پاکستاني حکومت د افغان کډوالو پر خلاف دایره تنګه کړې، خو زیاتوي چې دوی په پاکستان کې د افغان کډوالو ژوند او وضعیت له نېږدې څاري.
د دې وزارت ویاند شکېب مستغني زیاتوي، چې کله په دې تړاو د پاکستاني حکومت رسمي دريځ تر لاسه کړي؛ نو خپل غبرګون به له رسنيو سره شریک کړي.
افغان ولسمشر د جون په ۲۰ مه نېټه د کډوالۍ د نړیوالې ورځې په مناسبت په خپاره کړي پیغام کې له پاکستانه غوښتي، چې په دغه هېواد کې د کډوالو د مېشت کېدو پای ته رسېدونکې نېټه وغځوي.
ولسمشر غني غوښتنه کړې، چې پاکستانی لوری دې د افغانستان وضعیت ته په کتو سره په هغه هېواد کې مېشتو کډوالو ته د استوګنې نېټه تر یو وخت اوږده کړي.
د ملګرو ملتونو د کډوالۍ ادارې یا یونیسیار د شمېرو له مخې دا مهال په پاکستان کې ۱۵ سوه زره افغان کډوال ژوند کوي، چې د افغان حکومت، پاکستان او ملګرو ملتونه پرې سره راضي شوي دي او د کډوالۍ له حقوقو برخمن دي.
خو په همدې هېواد کې بیا سلګونه زره داسې افغان کورنۍ هم ژوند کوي، چې د کډالۍ په لېست کې یې نومونه نه شته، په هغې کې یو شمېر یې داسې دي، چې د پاکستان پېژندنپاڼه یې ترلاسه کړي او په هغه هېواد کې یې ځمکې او جایدادونه اخیستي دي، خو یو شمېر یې بیا داسې دي، چې د کډوالو په پنډغالو کې ژوند کوي د مهاجرت قانوني اسناد یې په لاس کې نه شته.
پاکستاني رسنۍ راپورنه ورکوي، چې د تېرې اونۍ د چهار شنبې په ورځ پاکستاني حکومت دا پرېکړه کړې او ایالتي حکومتونو ته یې د عملي کولو سپارښتنه کړې.
اوس وکتل شي، چې پاکستان افغان کډوالو سره په پخوانيو ژمنو درېږي، چې د همکارۍ او مرستې ټټر یې وهلی و او که د افغان کډوالو په خلاف خپلې دې تګ لارې ته ادامه ورکوي؟
