لویې څارنوالۍ د فساد په تور ۳ لوړپوړو حکومتي چارواکو د نیولو خبر ورکړ.
د دغې ادارې ویاند بصیر عزیزي نن یک شنبه (نومبر په ۲۲مه) په یوې خبري غونډه کې وویل، چې د مالیې وزارت د مالیې ورکوونکو ریاست دوه جګپوړي مامورین یې د ۱۶۵ زره امریکايي ډالرو د بډو اخیستلو په تور نیولي دي.
د لویې څارونوالۍ ویاند وايي، چې د نیول شویو کسانو دوسیې تر څېړنې لاندې دي او ډېر ژر به محکمې ته ولېږل شي.
د لویې څارونوالۍ ویاند زیاته کړه، چې د لوګر ولایت د کانونو او پترولیم ریاست رییس اجمل سهاک د فساد په تور د څارنوالۍ او ملي امنیت له لوري نیول شوی او دوسیه یې تر څېړنې لاندې دي.
ده وویل، د ښارجوړونې وزارت اداري مدیر هم د دوه میلیونو افغانیو په تور نیول شوی دی.
څه وخت مخکې د لوګر والي ویاند سلیم صالح سلام وطندار ته ویلي و، چې د دغه ولایت د کانونو او پټرولیم رییس اجمل سهاک د فساد او د کانونو ناقانونه کېندنو په تور د کابل په شهر نو سیمه کې د ملي امنیت مامورینو او د لویې څارنوالۍ غړیو له خوا د فساد په تور ونیول شو.
صالح ویلي و، د لوګر والي محمد حلیم فدايي د امنیې قوماندانۍ، ولایتي شورا او ملي امنیت مامورینو څخه یو ګډه کمېټه جوړه کړه، او دغې کمېټې ته یې د نده سپارلې وه، چې د کانونو او پترولیم ریاست کې موجود فساد و څېړي.
بصیر عزیزي همدا راز وویل، چې د پښتني بانک پخواني رییس حیات الله دیاني دوسیه هم بشپړه شوې ده.
د پښتني بانک رییس حیات الله او ۱۲کار کوونکي یې د اسنادو په جعل، مالي ناوړه استفادې، د وظیفوي غفلت او دخلکو د مېلیونونو ډالرو او ۱ زرو ۵ سوه ميليونه افغانيو په تور څلور کلونه مخکې زنداني شوي دي.
عزیزي وویل، حیات الله د ۳ واړو محکمو د پرېکړو پر بنسټ په لس کلونو بند او یو میلیارد نغدو افغانیو په پرېکولو محکوم شوی دی.
