د پاکستان د بهرنیو چارو وزارت په اسلام اباد کې د افغانستان سفیر عاطف مشعل احضار کړی او پاکستان ته د داعش خراسان څانګې د مشر اسلم فاروقي ورسپارلو غوښتنه یې کړې ده.
د پاکستان د بهرنيو چارو وزارت وايي چې پاکستان غواړي له اسلم فاروقي په افغانستان کې «د پاکستان ضد فعاليتونو» په اړه له هغه څېړنې وکړي.
د افغانستان ملي امنیت د حمل په ۱۶مه په یوه اعلاميه کې وویل چې د داعش ډلې د خراسان څانګې مشر اسلم فاروقي یې له نورو ۱۹ مهمو جنګیالیو سره په کندهار کې نیولی دی.
خو اوس د پاکستان د بهرنیو چارو وزارت په یوه اعلامیه کې ویلي: ((اسلم فاروقي له افغانستانه د پاکستان ضد فعالیتونو کې دخیل و او باید د نورو تحقیقاتو لپاره پاکستان ته وسپارل شي.))
اعلامیه کې ویل شوي چې افغانستان او پاکستان باید د ټاکل شوي میکانیزمونو په ګډون د تروریزم پرضد فعالیتونو کې ګډ کار وکړي.
