پر ټاکنو د څار یو شمېر بنسټونه وايي، د ټاکنیز سمون فرمان مسودې په اړه له دوی سره سلا مشوره نه ده شوې.
ولسمشرۍ ماڼۍ تېره ورځ د یوې خبرپاڼې په خپرولو سره ویلي، د تاکنیز سمون فرمان مسوده نهايي شوې او پرېکړه شوې، دغه طرحه د کابینې راتلونکې غونډې ته د بحث او تصویب له پاره وړاندې شي.
د دې خبرپاڼې پربنسټ د حکومت تقنین کمېټه د محمد سرور دانش په مشرۍ د دې مسودې متن د مدني ټولنو او سیاسي ګونډونو له غړو او د نړۍ د متخصصو بنسټونو له نظرونو سره سم برابر کړی دی.
د افغانستان د رڼو ټاکنو بنسټ رییس محمد نعیم ایوب زاده وايي، چې ولسمشر په ټاکنو د څار بنسټونو له سلا پرته دغه مسوده ترتیب کړې ده.
دغه بنسټ وايي، د ټاکنو د شکایتونو اورېدو کمېسیون د دغه فرمان په اساس لغوه شوی او پر ځای یې یو بورډ ټاکل شوی درې تنه د دغه کمېسیون او دوه تنه له یو بل بنسټ څخه ورته ټاکل شوي دي.
له بل لوري د ټاکنو له پاره د افغانستان د مدني ټولنو شبکې یا اکسین رییس جان داد سپین غر وايي، د حکومت له خوا د ټاکنو قانون دغه اصلاح شوې مسوده که د ټاکنیز نظام د سمون کمېسیون له طرحې سره برابره وي، د ټاکنو ستونزې حلولی شي.
دی وايي، که دغه طرحه د حکومت له لید سره سمه برابره شوې وي په ټاکنو د څار بنسټونو د نیوکو لامل کېږي.
په ورته وخت کې د ولسمشر ویاند مرستیال شاه حسین مرتضوي سلام وطندار ته وویل، د دغه فرمان مسوده چمتو شوې او د تصویب له پاره کابینې ته لېږل کېږي.
د مرتضوي په خبره، حکومت د سیاسي هوکړه لیک عملي کولو له پاره ژمن دی.
ټاکنیز سمون د دواړو مشرانو تر منځ د لاسلیک شوې سیاسي هوکړې اساسي برخه ده، خو لا هم دغه سمون په خپل ځای لانجمن پاتې دی.
