د ټاکنیزو شکایتونو کمېسیون رییس عبدالعزیز اریايي نن د ولسي جرګې او ولسوالیو شوراګانو ټاکنو د تاریخ د اعلان په غونډه کې یو ځل بیا له حکومته په ټینګار سره د دې کمېسیون د دارالانشا رییس د معرفي کولو غوښتنه وکړه.
د ښاغلي اريايي په خبره، دوی ۱۱ میاشتې مخکې ولسمشرۍ ماڼۍ ته د دې پوسټ لهپاره د ۳ نوماندانو لړلیک ورلېږلی؛ خو هغوی تر اوسه هېڅ اقدام نهدی کړی.
عبدالعزیز اریايي په رڼو او واقعيي ټاکنو کې د دارالانشا د رییس موجودیت اړین بولي.
د ولسمشرۍ ماڼۍ سرپرست ویاند شاهحسین مرتضوي وايي، دوی د ټاکنیزو شکایتونو کمېسیون د دارالانشا د رييس د برخلیک او څرنګوالي په اړه معلومات نهلري.
له بل لوري د ټاکنو خپلواک کمېسیون رییس ګلاجان بدیع صیاد وايي چې د ولسي جرګې او ولسوالیو شوراګانو ټاکنې د روان لمریز کال پر ۲۸مه نېټه کېږي او پهدا ډول شرایطو کې به ټاکنې له ستونزو خالي نه وي.
د هغه په وینا، د رڼو، عادلانه او له تقلبه د پاکو ټاکنو لهپاره یې ځېنې اصلاحات پیل کړيدي.
د ټاکنو خپلواک کمېسیون رییس دا هم وویل چې د رایو ورکوونکیو نوملیکنه د وري میاشتې په ۲۵مه لومړی په ښارونو او بیا د ولسوالیو په مرکزونو او کلیو کې پیلېږي.
