په ټاکنو کمېسیون د سیاسي ګوندونو او ډلو له فشار وروسته کمېسیون اعلان وکړ چې د ولسي جرګې په ټاکنو کې به له بایومتریک ټکنالوژۍ نه ګټنه وکړي چې له همدې سره د مایومتریک دستګاوو د انلاین یا افلاین کارېدولو په اړه په سیاسي محفلونو کې بحث ګرم شو. په تازه مورد کې سیاسي ګوندونو او ډلو له ټاکنو خپلواک کمېسیونه غوښتي چې په اتومات ډول د ګوتې پېژندنې الې Automated Fingerprint Identification Systems (AFIS) نه په انلاین ډول کار واخلي.
خو د ټاکنو خپلواک کمېسیون ویاند حفیظالله هاشمي له سلام وطندار سره په خبرو کې وايي چې له بایومترک دستګاوو نه د استفادې کارونه خلاص دي او ټاکل شوېده له بایومتریک دستګاوو نه په افلاین ډول کار واخېستل شي. ښاغلی هاشمي زیاتوي، پهدې بنسټ له افلاین طریقې کار اخلي چې د افغانستان ټوله جغرافیه انټرنېټي پوښښ نهلري.
خو لهدې مخکې د مخابراتو او معلوماتي ټکنالوژۍ وزارت سلام وطندار ته ویلي وو چې د افغانستان ۸۹ سلنه خاوره کې انټرنېټ کار کوي چې انټرنېټ د 2G او 3G او ځېنو لوی ښارونه د G4 سره وصل دي.
که د ولسي جرګې په ټاکنو کې له بایومتریک الې نه استفاده شوېوی؛ په اتومات ډول به د شخص ټول اطلاعات د انټرنېټ له لارې ځانګړي سرور ته ورتلل او په ټولو ټاکنیزو مرکزونو کې به شخص د دویم ځل لهپاره پېژندل کېدلو؛ خو اوس پرېکړه شوې چې له بایومتریک دستګاوو نه به په افلاین ډول استفاده وشي چې د ټاکنو له ورځې وروسته به ټولې الې له سرور سره وصل شي او بیا به وپلټل شي.
د فیفا اجرایوي رییس یوسف رشید سلام وطندار ته وویل چې د ټاکنو کمېسیون باید ژر تر ژر له بایومتریک دستګاه د استفادې طریقه خپره کړي. د ښاغلي رشیدي په خبره، د بایومتریک دستګاه د استعمال طریقه به د دې ستګاوو د کارونې په اړه راپورته شوې پوښتنې او د ولسي جرګې د ټاکنو د ترسراوي څرنګوالی ځواب کړي.
په ورته وخت کې د ټاکنو کمېسیون ویاند حفیظالله هاشمي وايي چې د دستګاوو د استعمال طریقه جوړه شوې او ټاکل شوې، د کمېسیون د غړیو له تصویب وروسته د دې کمېسیون په وېبپاڼه کې خپره شي.
