له ارګ نه د یوې خپرې شوې خبرپاڼې له مخې ملي امنیت شورا نن غرمه مهال د ټاکنو خپلواک کمېسیون په وړاندیز او د ولسمشر محمداشرف غني په مشرۍ د ولسي جرګې ټاکنو په اړه ځانګړې غونډه وکړه.
په غونډه کې د کندهار ولسونو د غوښتنې او د ټاکنو خپلواک کمېسیون په وړاندیز پرېکړه وشوه چې د کندهار پرونۍ پېښې له امله به په یاد ولایت کې د ولسي جرګې ټاکنې یوه اوونۍ وځنډېږي او نېټه به یې د ټاکنو کمېسیون اعلان کړي.
دغه راز د کورنیوچارو وزارت او د ملي امنیت عمومي ریاست په جلا وړاندیزونو او د ولسمشر په منظورۍ، د کندهار مخکېني امنیې قومندان جنرال عبدالرازق ته د سترپاسوالۍ او د یاد ولایت د امنیت مخکېني رییس جنرال عبدالمومن حسینخېل ته د ډګر جنرالۍ رتبې ورکړل شوې.
دا په داسې حال کې ده چې تېره ورځ کندهار کې د یاد ولایت چارواکو او افغانستان کې د ناټو عمومي قومندان سکاټ مېلر ترمنځ په سهیلي حوزه کې د ولسي جرګې ټاکنو په اړه امنیتي غونډه وشوه چې تر غونډې وروسته د یاد ولایت مقام ته څېرمه وسلهواله نښته وشوه چې له امله یې د کندهار مخکېنی امنیې قومندان جنرال عبدالرازق او د دې ولایت ملي امنیت رییس جنرال عبدالمومن حسینخېل ووژل شول او د والي په ګډون یوشمېر نور ټپیان شول.
که څه هم وسلهوالو طالبانو د یادې پېښې مسوولیت پرغاړه اخیستی، خو د پېښې څېړلو او د کندهار امنیتي وضعیت کنټرولو په موخه د ولسمشر په امر له کبله د ملي امنیت رییس محمدمعصوم ستانکزي په مشرۍ یو لوړپوړی پلاوی یاد ولایت ته تللی دی.
