د ناټو سرمنشي ینس سټولټنبرګ په یوه اعلامیه کې د ولسمشر غني او د پخواني اجرايه رييس عبدالله عبدالله تر منځ د خپلمنځي اختلاف ختمولو او د یو ټولشموله حکومت جوړولو د پرېکړې هرکلی کړی.
سټولټنبرګ زياته کړې، د کورونا ويروس او د افغانانو پر ضد د طالبانو د زیاتېدونکي تاوتریخوالي په حال کې ډېره اړینه ده چې ټول افغان مشران په خپل هېواد کې د سولې لپاره ګډ کار وکړي.
د ناټو اعلامیه کې له طالبانو غوښتل شوي چې تاوتریخوالی کم کړي، بین الافغاني مذاکراتو کې برخه واخلي او د سولې او افغانانو د ګټې لپاره جوړجاړی وکړي.
په افغانستان کې د ملګرو ملتونو استازولۍ يا یوناما هم په يوه اعلاميه کې د يادې سیاسي هوکړې هر کلی کړی او ویلي یې دي چې په دې هوکړې سره به افغان مشران د هغو لویو خطرونو سره د مبارزې جوګه شي چې افغانستان ورسره مخامخ دی.
د ايران د بهرنيو چارو وزير محمدجواد ظریف هم له ولسمشر غني او عبدالله عبدالله سره په يوه ټلفوني اړيکه کې ويلي چې د مصالحې شورا له لوري ايران د طالبانو او افغان دولت ترمنځ درېیمګړي ته چمتو دی.
چین، ترکیې، هندوستان، کاناډا، بریټانیا او ځینو نورو هېوادونو او سازمانونو د افغان مشرانو له دغه ګامه هرکلی کړی او هیله یې څرګنده کړې چې دغه هوکړه په افغانستان کې د سولې او ثبات لامل شي.
د ولسمشر غني او عبدلله عبدالله ترمنځ سياسي هوکړه له درې مياشتو وروسته تېره ورځ« د ثور ۲۸مه، يکشنبه» لاسليک شوه.
د يادې هوکړې پربنسټ به عبدالله د مصالحې عالي شورا رييس وي او په کابينه کې به هم ۵۰ سلنه ونډه ولري.
