د هېواد وتلی او مشهور کیسه لیکوال اکرم عثمان له اونیو ناروغۍ زغم وروسته د جمعې په ورځ د ۷۹ کلنۍ په عمر په سوېډن هېواد کې ومړ.
دنوموړي له وصیت سره سم نن (دوشنبه) ورځ د دغه هېواد په یونشاپنګ ښار کې چې د استکلهم او د ګوتنبرګ په لار موقعیت لري خاورو ته وسپارل شو.
خدای بخښلی عثمان له هېواده کلونه لرې په سویډن کې د کډوالۍ ژوند کولو.
لیکوال او شاعر عارف فرمان له سويډنه د تیلیفون په لیکه سلام وطندار ته وویل، چې د ارواښاد عثمان په جنازه کې کم شمېر فرهنګیانو برخه اخیستې وه.
دی وايي، له بده مرغه تر اوسه په دې هېواد کې د افغانستان د سفارت استازو د جنازې په مراسمو کې ګډون نه دی کړی.
فرمان ارواښاد عثمان د فارسي ژبې په ادبیاتو او په ځانګړې توګه په افغانستان کې اغیز لرونکی کیسه لیکوال بولي او زیاتوي، چې ارواښاد په خپلو کیسو او داستانونو سره د افغانستان کلتور نړیوالو ته ور وپېژندلو.
اکرم عثمان په ۱۳۱۶لمريز کال په هرات ولایت کې نړۍ ته سترګې وغړولې او د کورنيو جګړو په پېل کېدو له هېواده کډه او د خپل عمر وروستي کلونه یې په سویډن کې تېر کړل.
کوچه ما، مردها را قول است، همدا ډول نی ها ګل می کنند، درز دیوار او قحط سالي د خدای بخښلي له مشهورو داستاني او لیکني اثارو څخه دي چې چاپ شوي او په ادبي ډلو کې ځای لري.
