.jpg)
د هلمند په ناوې ولسوالۍ کې د جګړې ضد او سوله غوښتنې شاوخوا ۳۰۰ کسیز خوځښت سره چې د جګړې خلاف یې د اعتراض خېمه درولې نن ورځ ورسره ګڼو دیني عالمانو هم خپل پیوستون اعلان کړ.
د روانې وري میاشتې پر درېیمه چې کله د هلمند مرکز لښکرګاه ښار د غازي محمدایوب خان لوبغالي مخې ته موټربم برید ۱۶ ولسي وګړي ووژل او ۵۵ یې ټپيان کړل؛ دې پېښې په سبا ځایي ځوانانو او مدني فعالانو پر جګړې د اعتراض خېمه ودروله چې له دغه غږ سره یوشمېر مېرمنو هم پیوستون او دا دی اوس ځایي خلکو د هغه ولایت په ناوې ولسوالۍ کې هم د جګړې ضد او سولې غوښتنې خېمه درولې ده.
د ناوې ولسوالۍ د سوله غوښتنې خوځښت یو فعال شاولي سلاموطندار ته وویل چې خوځښت د دیني عالمانو په ګډون ولسي ملاتړ له ځان سره لري.
.jpg)
د هلمند سوله غوښتونکیو له هغه وروسته د نه خوړو اعتصاب وکړ چې طالبانو یې د اوربند په اړه غوښتنه ونهمنله.
د نه خوړو اعتصاب په درېیمه ورځ د شپږو معترضینو روغتیایي حالت خراب او د کوما په حالت کې روغتون ته ولېږدول شول، چې پرون ماښام د دیني عالمانو په غوښتنه دغه اعتصاب پای ته ورسېد خو پر جګړې د اعتراض خېمه لاهم ولاړه ده.
د ناوې ولسوالۍ اوسېدونکی او د ولسي حرکت بل غړي حاجي ملک سلاموطندار ته وويل پرجګړې د اعتراض او سوله غوښتنې خېمه به يې تر هغو ولاړه وي چې د جګړې ښکېلو غاړو يې د اوربند غوښتنه نه وي منلې.
د هلمند سوله غوښتونکیو او پرجګړې معترضینو سره د کابل، کندهار او ننګرهار په ګډون د ځینو نورو ولایتونو عامو خلکو او مدني فعالانو هم خپل پیوستون اعلان کړی دی.
