د هېواد سويلي هلمند ولایت د ناوې ولسوالۍ زرګونو ځوانانو د خپل ولایت او نورو سيمو د ساتلو له پاره د پولیسو لیکو سره د يوځای کېدو پريکړه کړې.
د راپورونو پر بنسټ د دغو ځوانانو شمېر ۵ زرو تنو ته رسيږي.
په ولسي جرګه کې د هلمند د خلکو استازی عبدالودود پوپل وايي، مخکې له دې، چې په هلمند کې د ځوانانو څخه د پولیسو لیکو سره د يوځای کېدو غوښتنه وکړي، نو په خپله زرګونه ځوانانو ویلي، چې دوی چمتو، څو د پولیسو لیکو سره يوځای شي.
همدارنګه د کورنيو چارو وزارت څخه راغلي استازي وايي، چې د دغو ځوانانو له ډلې ځينو د پولیسو ليکو ته د جلب او جذب له قانون سره سم شامل کړي او دا لړۍ روانه ده.
دغه ځوانان وروسته له هغه په دې ولایت کې د وسله والو طالبانو پر وړاندې جګړې ته چمتووالی ښيي، چې د دې ولایت ځينې مرکزي سيمې د وروستيو جګړو په ترڅ کې د طالبانو ولکې ته لوېدلې.
عبدالودود زیاتوي: " دا ځوانان چې شمیر يې شاوخوا ۵ زره کسانوته رسيږي، پخپله خوخښه له ناوې ولسوالۍ څخه چمتو شوي، چې د ملي پوليسو په لیکو کې شامل او له هلمند څخه دفاع وکړي".
د هغه په خبره تر اوسه ۴۰۰ تنو څخه زیات ځوانان د هلمند امنیه قومندانۍ له لارې د پولیسو سره يوځای شوي دي.
اخوا د کورنيو چارو وزارت څخه په دې موخه د راغلي پلاوي مشر مل پاسوال وکيل احمد هم وايي، چې ځوانانو يې د نورو ملي پوليسو په شان دې ليکو ته جذب کړي او د ملي پوليسو د قانون په چوکاټ کې به دندې پر مخ وړي.
په ورته وخت کې د راغلو ځوانانو له ډلې عبدالله جان او حاجي سردار، چې د ناوې ولسوالۍ اوسېدونکي دي وايي، په مرکزي سيمو کې ناامنۍ ډېرې شوې دي او
د هغو په خبره د ناامنيو د لا پراختیا څخه د مخنيوي په موخه يې کلک هوډ کړی، چې د پولیسو ليکو کې به شامل شي او له نورو امنيتي ځواکونو سره په ګډه له هلمند څخه دفاع وکړي.
عبدالله جان زیاتوي: " موږ په خپله خوښه راغلي یو؛ نور یوهیواد ته هم نه ځو، د خپل وطن دفاع کوو، موږ خپله چمتو یو، چې طالبانو او داعش پر وړاندی وجنګیږو او دا کارکوو."
په هلمند کی دا ځوانان په داسې حال کې د ملي پوليسو لیکو ته شامليږي، چې په ملي شورا کې د دې ولايت استازي وايي، د تېرو شپږو مياشتنیو جګړو په ترڅ کې شاوخوا ۱۶۰۰ پوليسو خپل ژوند له لاسه ورکړی دی.
