د ولسمشر محمداشرف غني او ملي مصالحې شورا رییس عبدالله عبدالله ترمنځ سیاسي هوکړه دوې میاشتې وړاندې لاسلیک شوه چې له مخې یې باید دواړه لوري د کابینې په جوړونه کې مساوي ونډه ولري.
که څه هم تر اوسه د عبدالله لهخوا ارګ ته د ور پېژندل شویو وزیرانو نوملړ په رسمي توګه نه دی اعلان شوی، خو د ولسمشر ویاند صدیق صدیقي پرون په کابل کې یوې خبري ناستې ته وویل چې د دوی د سیاسي متحدانو لهخوا په ورکړل شوي نوملړ کې یوشمېر کسان د وزیر کېدو وړتیا نه لري.
صدیقي زیاته کړه، حکومت د مسلکي کابینې جوړولو ته ژمن دی او اړتیا ده چې سیاسي متحدان هم د داسې کسانو نوملړ ورکړي چې د قانون په رڼا کې د وزیر کېدو وړتیا ولري.
خو اوس د مصالحې عالي شورا ویاند فریدون خوځون له سلاموطندار سره په خبرو کې ویلي چې د عبدالله عبدالله لهخوا د کابینې د غړیو په توګه جوړ شوی نوملړ له سیاسي او مسلکي معیارونو سره سمون لري او په دې اړه هېڅ ستونزه نشته.
د نوموړي په وینا، کوم نوملړ چې دوی ارګ ته لېږلی، پر ټولو معیارونو برابر دی او ښه به وي چې د اساسي قانون تر لوستلو پرته د چا سپکاوی ونه شي.
د سیاسي چارو کارپوه محمد حیدري وايي، د کابینې د غړیو معرفي کولو معیار اساسي قانون دی، خو هم ولسمشر محمداشرف غني او هم د مصالحې عالي شورا رییس عبدالله د سیاسي سلیقې او مصلحتونو له مخې د کابینې غړي معرفي کړي دي.
د ولسمشر غني او عبدالله عبدالله ترمنځ د سیاسي هوکړې پر لاسلیک شاوخوا ۲ میاشتې اوړي، خو لا هم د کابینې ټول غړي نه دي معرفي شوي.
ارګ وايي، د کابينې د نیمګړتیا لامل د عبدالله عبدالله لهخوا د وزیرانو نه معرفي کېدل دي. د حکومت دا کار له نیوکو سره هم مخ شوی دی. د ولسي جرګې غړي وايي، کابینه باید د دوی د دوبنیو رخصتیو له پیلېدو وړاندې ور وپېژندل شي.
