سره له دې، چې په مسکو کې د پاکستان، چین او روسیې ترمنځ د درې اړخېزې ناستې د اجنډا په اړه رسمي معلومات نه دي خپاره شوي، خو د چارو شنونکي وايي، د دې غونډې تمرکز به په افغانستان او روان امنیتي وضعیت وي.
د چارو څېړونکي وایي، په دې غونډه کې به په افغانستان کې د امریکایي ځواکونو پر پوځي اډو او د تازه راپورته شوې وسله والې ډلې داعش په خطرونو بحث وشي.
د دوی په نظر روسيه، چین، ایران او یو شمېر نورهېوادونه؛ داعش د منځنۍ اسیا له پاره ګواښ بولي او د دغو خطرونو مخنیوی د مسکو د درې اړخیزې ناستې د اجنډا مهمه برخه ده.
د امنیتي او سیاسي چارو څېړونکی محمود حیدري وایې، روسیه، چین او ایران په افغانستان کې د امریکايي ځواکونو له استوګنې د خطر احساس لري او له همدې امله په دغې درې اخیزې غونډه کې راټول شوي دي.
حیدري زیاتوي. له بل لوري په افغانستان کې د داعش وسله والې ډلې ورستيو جګړو هم دغه هېوادونه اندېښمن کړي.
د حیدري پر خبره، روسیه او چین د ځان او منځنۍ اسیا د خوندیتوب له پاره د داعش پر وړاندې د طالبانو د ملاتړ هوډ لري.
دی زیاتوي، د مسکو درې اړخیزه ناسته د همدې هماهنګۍ له پاره جوړه شوې ده.
محمود حیدري وویل، د مسکو په غونډه کې پاکستان د دلال رول لوبوي او د دې غونډې پایلې به په افغانستان کې د نیابتې جګړې دوام وي.
په همدې حال کې د چارو بل څېړونکی نظرمحمد مطمین وایي، چې د مسکو په درې اړخیزې ناستې کې به د افغانستان اړوندو مسایلو؛ لکه امنیت، سوله او په افغانستان کې د امریکایانو د پراخ پوځي حضور او په وروستیو تحولاتو بحث وشي.
مطمین زیاتوي، دا له امکان لرې نه ده، چې د دې درې اړخیزې ناستې په اړه په پټه طالبانو هم هوکړه کړي وي، خو د ده په نظر په افغانستان کې د چین او روسیې ښکېل کېدل د هېواد په ګټه دي.
افغان حکومت د دې غونډې په اړه اندېښنه ښودلې ده.
د بهرنیو چارو وزارت ویلي، چې په دې غونډه کې افغان حکومت ته د ګډون بلنه نه ده ورکړل شوې او دې کار په حکومتي، ولسي او پارلماني کړیو کې یو شمېر غبرګونونه را پارولي دي.
