د لوګر ولایت څخه رارسېدلي راپورونه وايي، چې د دغه ولایت د محکمې پر ودانۍ ډله ییز ځان مرګي برید له امله داستیناف څارنوال او ۴ برید ګر وژل شوي.
یوې امنیتي سرچینې، چې نه يې غوښتل نوم یې یاد شي سلام وطندار ته وویل، چې په برید کې د لوګر د استیناف څارنوال محمد اکرم نجات وژل په ګډون ۷ تنه وژل شوي او ۲۳ نور ټپیان دي.
د سرچینې پر وینا بریدګر۴ کسان وو چې ټول یې له امنیتي ځواکونو سره په جګړه کې وژل شوي.
تر دې مخکې د لوګر د والي ویاند سلیم صالح سلام وطندار ته ویلي چې شاوخوا ۱۰ بجې د لوګر مرکز پل علم کې د ملي پولیسو په جامو کې درې ځان مرګه بریدګر د محکمې ودانۍ ته ننوتلي او له امنیتي ځواکونو سره پر جګړه بوخت دي.
ویل شوي، د برید ځای ته نږدې د ولایت مقام کې د شاوخوا ۳۰۰ قومي مشرانو په ګډون غونډه هم جوړه شوې.
د برید په ځای کې د دوو چاودنو غږونه اوریدل شوي او په ښار کې د ډزو او امبولانسونو غږونه هم اوریدل کیږي.
محمد اکرم نجات د لوګر د استیناف څارنوال په توګه نن سهار اته بجې دنده پیل کړه خو شاوخوا ۱۰ بجې و وژل شو.
یاده دې وی، چې وسله والو طالبانو تر اوسه په دې اړه څه نه دي ویلي.
