د سربیا ځوانې ۲۰ کلنې فوټبال ملي لوبډلې د فوټبال نړېوالې شورا له خوا د ۲۰ کلنو په برابرولو نړېوال جام سیالیو د اتلولۍ جام ترلاسه کړ.
د فیفا د رسمي ویبپاڼې د معلوماتو له مخې، سربیایۍ لوبډلې په فاینل لوبه کې برازیل ته په ماتې ورکولو سره د اتلولۍ جام ترلاسه کړ.
د دې سترې بریا وروسته ځوانۍ سربیایۍ لوبډله د خپل هیواد په پلازمینه بلګراد کې د څه باندې ۵۰ زرو مینه والو له تود هرکلي سره مخ شوه او ځوانې سربیایۍ لوبډلې د اتلولۍ جام په ښودلو سره له خپلو مینه والو سره دغه ستره لاسته راوړنه په خوشحالیو ونمانځله.
د شل کلنو فوټبال نړېوال جام سیالۍ د نیوزیلینډ په کوربتوب ترسره شوې، چې په کې نیمانجا مکسیمویک د لوبې په اضافه وخت وروستۍ ۲ دقیقو کی دسربیا لوبډلې په ګټه یواځینۍ او تاریخي ګول ترسره کړ.
له دې وړاندې د ټاکلې وخت پای ته رسېدو پورې د دواړو برازیل او سربیا لوبډلو ترمنځ لوبه په یوه یوه ګول برابره پای ته رسیدلې وه چې پایله یې اضافه وخت ته ووته.
د سربیا داتلولۍ ترټولو جالبه خبره دا هم وه، چې سربیایۍ لوبډلې د ۲۰ کلنو په نړیوال جام فوټبال سیالیو کې خپله یوه لیګ لوبه هم په قانوني وخت کې نه وه ګټلې.
یادې لوبډلې هنګري او مالي لوبډلو ته د لوبې په اضافه وخت کې او امریکې لوبډلې ته د پنلټي په شوټونو سره ماتې ورکړې وې او ان تر فاینل پورې رسیدلې وه.
د ۲۰ کلنو ځوانانو فوټبال نړېوال جام سیالۍ د تیرې مۍ میاشتې په ۳۰ مه نیټه پیل او روانه اونۍ پاې ته ورسېدې.
په دې سیالیو کې د نړۍ ۲۴ مخکښو ځوانو فوټبال لوبډلو برخه اخیستې وه، چې د نیوزیلینډ په ۷ لوبغالو کې یې ټولټال ۵۲ لوبې ترسره کړې.
د سیالیو د رسمي پاڼې د معلوماتو له مخې، په دې سیالیو کې ټولټال ۱۵۲ ګولونه ترسره شول، چې د هنګري څخه بینسي میروو او د اوکراین څخه ویکټورکویلینکو په ۵ ګولونو سره مخکښ ګول وهوونکی اعلان شو.
دغه راز د مالي هېواد فوټبالر اداما غوره لوبغاړې، سربیایي راجکویک بهترینه ګول ساتوونکی اعلان شو، خو د اخلاقو کپ جایزه بیا اکراینۍ فوټبال لوبډلې ته ډالۍ کړی شوه.
