.jpg)
د غور سیمهییز چارواکي او د ولایتي شورا یوشمېر غړي وايي، د قراردادي شرکت تښتېدو له امله د دغه بند جوړولو چارې ځنډول شوي دي.
د هریرود فرعي حوزې رییس محمد امین وکیل سلاموطندار ته وايي، نژدې دوه میاشتې کېږي د "روس الکترو" په نوم د دغې پروژې قراردادي شرکت تښتېدو او د دوو نورو شرکتونو حقوقي شخړو له امله، د غور پوزلیچ برېښنا بند جوړلو چارې ځنډول شوي دي.
ښاغلی وکیل زیاتوي، ټاکل شوې وه د دغه برېښنا بند جوړولو چارې سږکال بشپړې او ګټې اخیستو ته وړاندې شي، خو د مرکزي حکومت چارواکیو او د دغه ولایت د سیمهییزو مسوولینو نه پام له کبله یې یوازې ۱۹ سلنه چارې مخ ته وړل شوي.
د غور ولایتي شورا غړی عبدالبصیر قادري هم د پوزلېچ برېښنا بند جوړولو چارو ځنډېدو او لاس په لاس کېدو څخه اندېښنه څرګندوي وايي، د دغه بند جوړولو په برخه کې د حکومت نه پام لامل شوی چې د غور خلک د برېښنا بند جوړولو په اړه خپلې هیلې له لاسه ورکړي.
د ښاغلي قادري په وینا، سره له دې چې د دغه ولایت اوسېدونکیو د بند جوړولو لهپاره پراخ اعتراضونه کړي وو، خو حکومت بند جوړولو ته هېڅ اراده نهلري.
د غور ولایتي شورا دغه غړی خبرداری ورکوي، که چېرې حکومت لنډ وخت کې د دغه بند جوړولو لهپاره ګام پورته نه کړي، د اعتراض ترڅنګ به د مرکزي حکومت له ملاتړه لاس واخلي.
په ورته وخت کې د غور والي ویاند عبدالحی خطیبي د پوزلېچ برېښنا بند جوړولو چارو ځنډول مني، خو وايي موضوع یې له مرکزي چارواکیو سره شریکه کړې او هڅه کوي د روسیې سفارت په همکارۍ قراردادي شرکت د بند جوړولو ته اړ کړي.
له دې وړاندې هم د دغه بند ساتونکیو د خپلو حقونو نه ترلاسه کولو او پوځي تجهیزاتو نهشتون له امله اعتراض کړی و او د دغه ولایت له سیمهییزو چارواکیو یې غوښتي وو، د دوی معاشونه ورکړي.
د ویلو ده د پوزلېچ برېښنا بند د څلورنیم میګاواټه برېښنا تولیدولو ظرفیت لري، چې د خلکو د کورونو روښانه کولو ترڅنګ به کرنیزې ځکمې هم اوبه کړي.
