د غور ځېنې مدني فعالان د دې ولایت د اور وژونې ډلې چارواکي په کمکارۍ تورنوي او وايي، د اور وژونې اداره وداني او امکانات نهلري او یوازې په یو ټانکر موټر خلکو ته خدمتونه وړاندې کوي.
د غور دوه مدني فعالان غلام رباني هدفمند او خدایار واقف وايي، د اور لګېدلو د ډېرو پېښو پر مهال د اور وژونې ډله د کور او مغازو له ټولو وسایلو سوځېدلو وروسته سیمې ته رسېږي.
دوی غوښتنه کوي چې امنیه قوماندانۍ دي د خلکو اړتیاوو په درک کولو سره دې برخې ته جدي پام وکړي.
د غور ولایتي شورا غړی عبدالحمید ناطقي هم دې ولایت کې د اور وژونې ادارې خدمتونه پڅ بولي او وايي، څو کاله کېږي چې د اور وژنې ادارې د ودانۍ جوړېدو چارې په نیمه کې پاتې دي او د دې ترڅنګ د پوره وسایطو او پرسونل د نهشتوالي له امله د ښار له لنډه سیمه کې هم د اور وژنې توان نهلري.
د غور امنیې قومندانۍ ویاند محمداقبال نظامي دې ولایت کې د اور وژونې ادارې د تجهیزاتو کې کموالی مني او وايي، دا وخت د اور وژنې درې عرادې موټرې لري چې درېواړه له کاره لوېدلي او بیارغولو ته اړتیا لري.
د ده په خبره، یو موټر یې هم لعلاو سرجنګل ولسوالۍ ته ورکړی او یو بل لوی موټر لري چې د ژمي په موسم کې یې د درولو ځای ته حیران وي.
د غور امنیې قومندانۍ ویاند زیاتوي، دغه ستونزه یې په وار ـ وار له حکومتي چارواکیو سره شریکه کړېده؛ خو تراوسه ورته پام نهدی شوی.
د تېر کال جدي کې ناپېژندو کسانو غور کې دوو ځايي راډیوګانو ته اور واچولو چې د اور وژونو موټرو د نهشوالي له امله د دغو دوو راډیوګانو ټول وسایل او تجهیزات وسوځېدل.
