له اداري فساد سره د مبارزې ادارې مسوولین وايي، د اداري فساد د درنو جرمونو پر وړاندې د مبارزې عدلي او قضايي مرکز د دوو مامورنیو وژل کېدل د مبارزې بهیر ته جدي خبرداری دی.
د تېرې دوشنبې په ورځ ناپېژاندو وسله والو د اداري فساد د درنو جرمونو پر وړاندې د مبارزې عدلي او قضايي مرکز دوه کارکوونکي په قمبر څلور لاره کې ووژل.
د دې پېښې مسوولیت تراوسه هېڅ ډلې نه دی منلی.
د فساد سره د مبارزې عالي ادارې رییس سید حسین فخري وايي، که حکومت د دوی د مامورینو امنیت خوندي نه کړي د فساد سره د مبارزې بهیر به سخت شي.
د فخري په خبره، مافیايي کړۍ او زورواکي د فساد دوسیې لري او دغه ډلې د دې ادارې په مامورینو بریدونه کوي.
د اداري فساد سره د مبارزې شبکې رییس خان زمان امرخېل وايي، تراوسه په هېواد کې د فساد سترې دوسیې په جدي توګه څېړل شوي نه دي او په دې برخه کې شوي ډېر کم اقدامات هم د واکمنو کړیو له خوا چې فساد کې ښکېل دي د زغم نه دي.
امرخېل وايي، که د فساد سره د مبارزې بنسټونو په کارکوونکو د بریدونو مخنیوی ونه شي د فساد له پاره نوره زمینه هم برابریږي.
د اداري فساد د درنو جرمونو پر وړاندې د مبارزې عدلي او قضايي مرکز د یوې خبرپاڼې په خپرولو له امنیتي بنسټونو د تېرې ورځې د برید د عامیلینو د نیولو غوښتنه کړې ده.
د کورنیو چارو وزارت ځای ناستي ویاند نجیب دانش وايي، د دغه برید د عامیلنو معلومولو او نیولو په برخه کې څېړنې پیل شوي دي.
