/کندهار.jpg)
وسلهوالو طالبانو او حکومت په هلمند او کندهار کې د یو بل ترولکې لاندې سیمو پر اوسېدونکیو برېښنا بنده کړېده.
وسلهوالو طالبانو ترهغې وروسته چې دولت یې له کجکي بنده د ډېرو اوبو خوشې کولو غوښتنه ونه منله، د دولت ترولکې لاندې سیمو پراوسېدونکیو برېښنا بنده کړه.
طالبانو د دې ترڅنګ د برېښنا ریاست هغه ۷ کارکوونکي هم یرغمل کړي چې د هلمند په سنګین ولسوالۍ کې یې د برېښنا مزي بېرته تړل.
داسې ښکاري چې د هلمند او کندهار چارواکیو یې هم په غبرګون کې د هغو سیمو برېښنا بنده کړې چې د وسلهوالو طالبانو په واک کې دي.
د کندهار د والي دفتر مطبوعاتي مسوول عزیزاحمد عزیز سلاموطندار ته وویل چې طالبانو د برېښنا ریاست له مسوولانو غوښتي وو چې د دوی تر کنټرول لاندې سیمو ته ډېره برېښنا او له کجکي بنده ډېرې اوبه ورخوشې کړي.
د ده په وینا، حکومت او د برېښنا ریاست مسوولانو د طالبانو غوښتنو ته د «نه» ځواب ورکړی چې هغوی یې هم په غبرګون کې د کندهار او هلمند ولایتونو د برېښنا مزي پرې کړي دي.
عزیز وايي، د هلمند او کندهار والیانو هم د طالبانو د دې کار په غبرګون کې د ورته اقدام پرېکړه کړې ده.
خو د کندهار اوسېدونکي په دې ولایت کې د زیاتې تودوخې او د برېښنا بندېدو شکایت کوي او وايي، طالبان او حکومت دې د خپلو غوښتنو لهپاره د عامو خلکو حقونه تر پښو نه لاندې کوي.
د کندهار اوسېدونکي سیداحمد او سعید پهدې اړه سلاموطندار ته وویل چې دې ولایت کې د تودوخې درجه لوړه ده او د برېښنا او اوبو نهموجودیت له ګڼو ستونزو سره مخ کړي دي.
دوی له دولت او وسلهوالو طالبانو غواړي چې د خپلمنځو ستونزو له کبله دې د دوی ژوند نه سختوي او ژر تر ژره دې برېښنا ورخوشې کړي.
خو د کندهار د برېښنا ریاست مسوول امانالله ایوب فاروقي هم د برېښنا او اوبو نهشتوالي برخې کې د خلکو ستونزې مني، خو وايي، له وسلهوالو طالبانو سره یې پهدې اړه خبرې اترې روانې دي.
/download (2).jpg)
فاروقي له وسلهوالو طالبانو او حکومت نه هم غواړي چې برېښنا د خلکو حق دی او دوی دې یې د وسیلې په توګه نه کاروي.
د کندهار د برېښنا رییس زیاتوي، ټولو ښاریانو ته د جنراتورونو په وسیله د برېښنا رسولو ظرفیت نهلري او که وسلهوال طالبان دې ښار ته برېښنا خوشې نهکړي؛ خلک به له ګڼو ستونزو سره مخ شي.
د چارواکو په وینا، کندهار ښار ټولټال ۱۵۰ مېګاواټه برېښنا ته اړتیا لري چې ۲۰ مېګاواټه یې له هلمنده رالېږدوي او لږ نوره یې هم د جنراټورونو په وسیله تولیدوي، خو له تېرو دوو شپو راهیسې کندهار او هلمند دواړه تیاره دي.
