ولسمشر محمداشرف غني تېره شپه د هند له لومړي وزیر نرېندرا مودي سره د قرغېزستان په پلازمېنې بیشکیک کې د لیدنې پر مهال د افغان سولې په برخه کې د سیمې هېوادونو پر همکارۍ ټینګار کړی دی.
ولسمشر غني وايي، «د سیمې هېوادونه دې د افغان سولې په برخه کې خپلې همکارۍ همغږې او منظمې کړي.»
د نوموړي په وینا، «باعزته او تلپاتې سوله د افغانانو بنسټیزه غوښتنه او د حکومت لومړیتوب او مسوولیت دی.»
د هند لومړي وزیر نرېندرا مودي په یاده لیدنه کې ویلي چې «هېواد به یې د افغانستان د یوه سټراټېژیک همکار په توګه د افغانانو ترڅنګ ولاړ وي.»
هغه ټینګار کړی چې هند د افغانانو په مشرۍ او مالکیت د سولې «بینالافغاني خبرو اترو ملاتړ کوي.»
د دواړو هېوادونو مشرانو د یادې لیدنې پر مهال له ترهګرۍ سره د مبارزې، سیمهییز اتصال، د اقتصادي او ټرانزیټي همکارۍ پراختیا او د افغان سولې لپاره د سیمهییزې اجماع په اړه خبرې کړې دي.
